HTML (inglisshe: Hypertext Markup Language) - gipertekstli hújjetler jaratıw ushın arnawlı til. Bul til teg (tag) dep atalıwshı arnawlı kodlardan ibarat. Bul kodlar web-bette kórinbeydi, biraq olardıń járdeminde avtor brauzer aynasında web-bet qanday súwretleniwi kerekligin táripleydi. Hújjettegi tekst parametrleri, grafikalıq obektlerdiń jaylasıwı, reńler, gipersiltemeler h.t.b. sol tegler járdeminde beriledi. Demek, tegler – bul brauzer túsinetuǵın kodlar, xızmetshi sózler.
HTML hújjeti <html> hám </html> tegleri arasındaǵı tekst bolıp tabıladı. Bul ashıwshı (<html>) hám jabıwshı (</html>) tegler juplıǵı bolıp, bul hújjet HTML tilinde jazılǵanlıǵın bildiredi. HTML hújjeti <head>...</head>, <title> … </title>, <body>… </body> bólimlerden ibarat boladı. Olardıń ishinde hújjettiń bası, atı hám denesi beriledi. Odan basqa shrift ólshemin, bette jaylasıwın, reńin, abzats, súwret parametrlerin belgilew, gipersiltemeler jaratıw, hár qıylı kesteler, formalar, freymler qoyıw ushın arnalǵan tegler ham bar.
