Rasizm

Rasizm — jest věra, že grupy ljudij imajut različne črtky postupanja, odpovědajuče naslědujemym priznakam, i mogut byti razděljene na osnově prědnosti jednoj rasy ili etničnoj prinaležnosti nad inoj. On takože može označati prědsudja, diskriminaciju ili antagonizm, napravjene protiv inyh ljudij vslěd jihnogo etničnogo proizhodženja. Dnešny varianty rasizma često sut osnovane na socialnom vozprijetju biologičnyh različij medžu ljudami. Tute pogledy mogut prijmati formu socialnyh dějanjij, praktik ili věrjenjij, ili političnyh sistem, v ktoryh različne rasy rangujut se kak neizměnno vysše ili nizše po odnošenju jedna k drugoj na osnově prědpokladajemyh občih naslědujemyh črt, sposobnostij ili kvalitetov. Byli probovanja legitimizovati rasistke prědsudja srědstom nauky, take kak naučny rasizm, ale jihna neosnovanost v večinstvu padov byla dokazana. S točky pogleda političnyh sistem (napriměr, apartejida), ktore poddrživajut izraženje prědsudij ili odvračenja v diskriminacionyh praktikah ili zakonah, rasistka ideologija može vključati v sebe svezane s njej socialne aspekty, take kak sut nativizm, ksenofobija, inakovost, segregacija, hierarhično rangovanje i supremacizm.