Marcelo Rebelo de Sousa

Marcelo Nuno Duarte Rebelo de Sousa (f. 12. desember 1946) er portúgalskur lögfræðingur, stjórnmálamaður, fræðimaður og fyrrverandi forseti Portúgals. Hann var 20. forseti landsins og gegndi embættinu frá árinu 2016 til ársins 2026. Rebelo de Sousa hefur lengst af verið meðlimur í portúgalska Jafnaðarmannaflokknum (sem er hægriflokkur þrátt fyrir nafnið) og var leiðtogi flokksins frá 1996 til 1999, en hann sagði sig tímabundið úr flokknum eftir að hann varð forseti. Fyrir forsetatíð sína var Rebelo de Sousa jafnframt þjóðkunnur í Portúgal sem stjórnmálaskýrandi sem birtist í eigin sjónvarpsþáttum.

Rebelo de Sousa var endurkjörinn í forsetakosningum árið 2021. Hann hafði notið mikilla vinsælda í embættinu, svo mjög að portúgalski Sósíalistaflokkurinn, sem sat við stjórn landsins, hafði ekki fyrir því að kosta mótframboð gegn honum. Rebelo de Sousa náði hreinum meirihluta atkvæða svo ekki þurfti að kalla til annarrar kosningaumferðar.