Thessaloniki, mega dikumbai Tesalonika, Saloniki tauka Salonika nya nengeri kedua pemadu besai ba Gerika, enggau penyampau tubuh sepemayuh urung sejuta orang dalam kandang mengeri, lalu nyadi indu nengeri ungkup kandang menua geografi Makedonia. Dalam Jaku Gerika, nengeri tu dikelala enggau nama "η Συμπρωτεύουσα" (i Symprotévousa), ke mai reti "indu nengeri kedua", meri nuju ngagai status iya dalam sejarah Συμβασιλεύουσα (Symvasilévousa) tauka nengeri "pemerintah kedua" Empayar Byzantin beserimbai enggau Konstantinopel.
Thessaloniki bepalan ba Teluk Thermaikos, ba sukut barat laut Teluk Aegia. Nengeri tu di sempadan ba barat enggau delta Axios. Kandang menua Thessaloniki, pusat besejarah, ngundan penyampau tubuh 319,045 iku orang naka taun 2021, lalu kandang mengeri iya ngundan 1,006,112 iku orang diau lalu kandang menua ke besai agi bisi 1,092,919 iku orang. Nengeri tu nyadi pusat kedua ekonomi, industri, dagang enggau politik ba menua Gerika, lalu nyadi hab perengka pengangkut pemadu besai ba Gerika enggau tenggara Eropah, nengah Palan Penyangkal Kapal Thessaloniki. Nengeri tu tebilang enggau pengerami, pengawa sereta pengidup budaya ti regas selampur iya. Pengawa baka Bansal Entarabansa Thessaloniki enggau Festival Filem Entarabansa Thessaloniki bisi ninting taun. Thessaloniki kala nyadi Indu Nengeri Biak Eropah 2014. Universiti besai nengeri tu, Universiti Aristotle, mya universiti ke pemadu besai ba Gerika enggau Balkan.
