Republik Chek, mega dikelala enggau nama Chekia, lalu nitihka sejarah dikelala enggau nama Bohemia, nya sebengkah menua ti nadai tasik di Eropah Tengah. Menua tu di bekunsi garis entara menua enggau Austria ba selatan, Jerman ba barat, Poland ba timur laut, enggau Slovakia ba tenggara. Republik Chek ngembuan rampa menua ti bebukit ti ngembuan pemesai 78,871 km persegi (30,452 bt persegi) enggau iklim benua enggau tasik ti tebal agi angat. Indu nengeri enggau mengeri ti pemadu besai iya nya Praha; mengeri besai enggau kandang mengeri bukai nyengkaum Brno, Ostrava, Plzeň enggau Liberec.
Duchy Bohemia ditumbuhka ba ujung abad ke-9 lalu maya nya di baruh pegai Moravia Besai. Iya diaku enggau formal nyadi Estet Imperial Empayar Rome Kudus dalam taun 1002 lalu nyadi sebengkah menua perintah dalam taun 1198. Berindik ari Perang Mohács dalam taun 1526, semua Tanah Mahkota Bohemia berinsur disegulaika ngagai monarki Habsburg. Semak seratus taun udah nya, Penyarut Bohemia Protestan ngujungka Perang Tiga Puluh Taun. Pengudah Perang Bukit Burak, raban Habsburg ngenegapka perintah sida. Sepengudah pengererak Empayar Rome Kudus dalam taun 1806, tanah-tanah Mahkota nyadi sebagi ari Empayar Austria.
Maya abad ke-19, menua Chek ngasaika industrialisasyen ti besai. Berindik ari Austria-Hungary runtuh pengudah Perang Dunya I, tebal kandang menua nya nyadi sebagi ari Republik Chekoslovakia Keterubah dalam taun 1918. Chekoslovakia semina sebengkah menua di Eropah Tengah enggau Timur ti mengkang nyadi demokrasi beparlimen sekumbang timpuh entara perang. Pengudah Sempekat Munich dalam taun 1938, Jerman Nazi enggau sistematik nguasa tanah Chek. Menua Chekoslovakia dipulaika baru dalam taun 1945 lalu tiga taun udah nya nyadi menua komunis Blok Timur berindik ari pengerampas kuasa dalam taun 1948. Uji deka ngelepaska perintah enggau ekonomi dipuntan ketegal serang ngagai menua nya ti betuaika Soviet maya Angkat Praha dalam taun 1968. Kena bulan November 1989, Revolusyen Beludru mutuska perintah komunis ba menua nya lalu mulaika demokrasi. Kena 31 Disember 1992, Chekoslovakia diserara enggau likun, enggau nengeri-nengeri ke nyadi menua meredeka iya nya Republik Chek enggau Slovakia.
Republik Chek nyadi sebengkah menua republik beparlimen ti begempung sereta menua ti mansang enggau ekonomi makit sosial ti mansang sereta bepenatai pemisi tinggi. Menua tu nyadi sebengkah menua enggau pengelantang pendiau sereta model sosial Eropah, nyaga pengerai universal enggau pelajar universiti tuisyen pechuma. Menua tu ba penuduk lumur 32 dalam Indeks Pemansang Mensia. Republik Chek nyadi kaban Gerempung Bansa Beserakup, NATO, Serakup Eropah, OECD, OSCE, Kaunsil Eropah enggau Raban Visegrád.
