Terence David John Pratchett (Beaconsfield, Buckinghamshire, Anglaterra le 28 de april 1948 – Broad Chalke, Wiltshire, Anglaterra le 12 de martio 2015), cognoscite como Terry Pratchett, esseva un autor anglese qui esseva cognoscite pro su romances phantastic comic, specialmente le 41 romances del serie de Mundo Disco.
Pratchett initialmente travaliava in jornalismo e como un official de pressa pro centrales electric nuclear usque 1987. Su prime libro, Le Gente del Tapete, esseva publicate in 1971. Le prime romance del serie de Mundo Disco esseva Le Color de Magia, publicate in 1983. Depost, Pratchett scribeva in media duo libros per anno. Le romances original del serie parodiava litteratura phantastic; le romances subsequente expandeva le satira a themas altere e incorporava themas seriose etiam. Pratchett deveniva le melio vendente autor in le Regno Unite del annos 1990, e continueva scriber best-sellers post 2000. Su libros ha vendite 85 million copias e essite traducite in 37 linguas.
Pratchett recipeva multe premios e honores pro su obras. Ille ganiava le Medalia Carnegie pro Le Stupende Maurice e su Roditores Educate, le prime libro de Mundo Disco que esseva mercate a infantes. Ille esseva armate cavallero in 2009 a causa de servicios al litteratura. In 2007, ille esseva diagnosticate con maladia de Alzheimer. Ille continueva scriber, appoiava caritates contra le maladia e argueva pro le derecto de euthanasia. Ille moriva in 2015 de complicationes del maladia. Le ultime libro de Mundo Disco, Le Corona del Pastor, esseva publicate cinque menses depost.
