Մոլա Վագե (ֆրանսերեն՝ Molla Wagué, փետրվարի 21, 1991, Վեռնոն), ֆրանսիացի և մալիացի ֆուտբոլիստ, պաշտպան:
Ակումբային կարիերա
«Կան» ակումբի սան է։ 2011 թվականի նոյեմբերի 6-ին «Դիժոնի» դեմ խաղում նորամուտն է նշել Լիգա 1-ում։ Նոյեմբերի 19-ին «Այաչոյի» դեմ խաղում առաջին գոլն է խփել «Կանի» կազմում։ Մրցաշրջանի արդյունքներով թիմը անցել է Լիգա 2, որտեղ հաջորդ երկու տարիների ընթացքում հանդես է եկել Մոլան։ Աստիճանաբար տեղ է գրավել հիմնական կազմում և դարձել է ակումբի պաշտպանության առաջատարներից մեկը:
2014 թվականի ամռանը տեղափոխվել է իսպանական «Գրանադա» և անմիջապես նոր ակումբը նարն տվել է իտալական «Ուդինեզեին»։ Դեկտեմբերի 21-ին «Սամպդորիայի» դեմ խաղում նորամուտն է նշել Սերիա A-ում։ 2015 թվականի մարտի 8-ին «Տորինոյի» դեմ խաղում խփել է առաջին գոլը «Ուդինեզեի» կազմում։
2017 թվականի սկզբին վարձավճարով տեղափոխվել է անգլիական «Լեսթեր Սիթի»։ Փետրվարի 18-ին «Միլոուլի» դեմ Անգլիայի գավաթի խաղում նորամուտն է նշել «աղվեսների» կազմում։ 70-րդ րոպեին վնասվածք է ստացել, որը նրան խաղից դուրս է թողել մինչև մրցաշրջանի ավարտը։ Մրցաշրջանի մնացած ընթացքում վերականգնողական կուրս է անցել․ «Լեսթերը» որոշում է կայացրել մրցաշրջանի ավարտից հետո հրաժարվել ֆուտբոլիստից։ Վարձակալության ընթացքում միակ հանդիպումն է անցկացրել «աղվեսների» կազմում:
2017 թվականի ամռանը միացել է «Ուդինեզեին», սակայն խաղային պրակտիկա ստանալու համար հանձնվել է «Ուոթֆորդին»: «Սուոնսի Սիթիի» դեմ խաղում նորամուտն է նշել Անգլիայի Պրեմիեր լիգայում: Դեկտեմբերի 26-ին նախկին ակումբի՝ «Լեսթեր Սիթիի» դեմ խաղում առաջին գոլն է խփել «Ուոթֆորդի» կազմում։
2019 թվականի հունվարի 31-ին վարձավճարով տեղափոխվել է «Նոթինգհեմ Ֆորեստ» ակումբ․ առաջին խաղում գոլ է խփել «Բրենտֆորդի» դարպասը։
2019 թվականի հուլիսի 17-ին տեղափոխվել է ֆրանսիական «Նանտ»։ Պայմանագիրը նախատեսված էր 3 տարվա համար:
Միջազգային կարիերա
2013 թվականին ընդգրկվել է Աֆրիկայի գավաթի խաղարկության հայտացուցակում։ Մրցաշարում մասնակցել է Նիգերի, Կոնգոյի Դեմոկրատական Հանրապետության, Հարավային Աֆրիկայի և Նիգերիայի թիմերի դեմ խաղերին։ Մրցումների արդյունքներով դարձել է բրոնզե մեդալակիր:
2015 թվականի սկզբին Աֆրիկայի գավաթի համար երկրորդ անգամ մեկնել է Հասարակածային Գվինեա։ Մրցաշարում մասնակցել է Կամերունի, Կոտ դ' Իվուարի և Գվինեայի թիմերի դեմ խաղերին։
Նույն թվականի մարտի 25-ին Գաբոնի հավաքականի դեմ ընկերական խաղում դուբլի հեղինակ է դարձել՝ խփելով առաջին գոլերը ազգային թիմի կազմում։
2017 թվականի սկզբին Գաբոնում երրորդ անգամ մասնակցել է Աֆրիկայի գավաթի խաղարկությանը։ Մրցաշարում մասնակցել է Եգիպտոսի, Գանայի և Ուգանդայի թիմերի դեմ խաղերին։
Մալիի հավաքականի գոլեր
| # | Ամսաթիվ | Վայր | Հակառակորդ | Հաշիվ | Արդյունք | Մրցույթ |
|---|---|---|---|---|---|---|
| 1 | 25 մարտի 2015 | Պիեռ Բրիսոն, Բովե, Ֆրանսիա | Գաբոն | 1:0 | 3:4 | Ընկերական հանդիպում |
| 2 | 25 մարտի 2015 | Պիեռ Բրիսոն, Բովե, Ֆրանսիա | Գաբոն | 2:1 | 3:4 | Ընկերական հանդիպում |
| 3 | 9 հոկտեմբերի 2015 | Ստադ դե լ ' ՈԲ, Տրուա, Ֆրանսիա | Բուրկինա Ֆասո | 4:1 | 4:1 | Ընկերական հանդիպում |
| 4 | 28 մարտի 2016 | Մալամբո, Մալամբո, Հասարակածային Գվինեա | Հասարակածային Գվինեա | 0:1 | 0:1 | Աֆրիկայի գավաթ 2017 որակավորում |
