Michael Faraday; Newington Butt, 22 jasyporundy 1791-Hampton Court, 25 jasypoapy 1867) ha'e akue peteĩ tembikuaatyhára Tavetã Joaju pegua. Ohesa'ỹijo heta mba'e ohechaukáva mba'éichapa tendyry osyrýva inimbo ikatu ojapo ojapoháicha umi itakaru (ko'ágã ojehero pe tembikuaa "magnetismo tendyry pegua"). Heta ohesa'ỹijo avei mba'éichapa ikatu jaipuru tendyry umi eleménto kímiko reheve ñamoambue hag̃ua ichupekuéra (kímika tendyry pegua ojehero ko'ágã). Ohechauka avei magnetismo ikatu omoambue araresa. Hembiapokue rupive, ikatu jaipuru tendyry jaipuruháicha ko'ágã.
Jepémo sa'i ojehupyty tekombo'e hekópe, Faraday ha'e peteĩva umi tembikuaatyhára oñemomba'eguasuvéva tembiasakuépe. Kímika rembikuaápe, Faraday ohecha'ypy pe benceno.
Faraday oikuaauka hemimo'ã ha hembiapokue ñe'ẽ hesakã ha ndahasýiva rupive. Ta'ãhakuéra Ypykatu Hetatetãgua oipuru oha'ã hag̃ua tendyry retakue pe faradio (F), omomba'eguasúvo Faraday-pe.
Pe mba'erekokuaahára Selánda Pyahu pegua Ernest Rutherford he'i Faraday-gui: "Jajepy'amongetávo ituichápa ha ipukúpa umi mba'e ohechauka ha oheja va'ekue tembikuaatýpe ha ñemba'apópe, ndaipóri terakuãporã ikatu omyengovia Faraday mandu'ápe, peteĩva umi tembikuaatyhára ohesa'ỹijóva tuichavéva opa áragui".