رابرت آنتؤني دنيرؤ آمريکايي بازیگر، کارگردان ؤ تهيه گۊدنکس ايسه. اۊن ايته جه خۊ نسل ٚ پيله بازيگران ايسه. دنيرؤ پۊر جایزه فگيته گه اۊشان ٚ جه شأ دۊته اؤسکار ؤ ايته گؤلدن گلؤب-أ ايضاره گۊدن ؤ هأتؤني بفتا جایزه ره هشت وار ؤ امي جایزه ره ني چار وار نامزد بؤبؤسته. دنيرؤ ۲۰۰۳ سال ٚ دۊرۊن AFI جایزه، ۲۰۰۹ کندي مرکز ٚ جایزه، ۲۰۱۱ سسيل بي دميل ٚ جایزه، ۲۰۱۶ ريئيس جؤمۊري أزايي بارام، ۲۰۱۹ سينما بازيگران ٚ أنجۊمن ٚ جایزه ؤ ۲۰۲۵ گۊلازي زريني نخل ٚ أمرأ أن ٚ جه تقدير بۊگۊدئد.
دنيرؤ خۊ بازيگري تحصيل-أ اچ‌بي استۊديؤ، استلا أدلر ٚ بازيگري استۊديؤ ؤ لي استراسبرگ ٚ بازيگري استۊديؤ مئن بۊگذرانه. اۊن دۊته اؤسکار فگيته گه ايته ويتؤ کؤرلئؤنه أورنايي نخش ٚ شين گادفادر ٚ دۊوؤمي واوين ٚ فئلم ٚ دۊرۊن ايسه ؤ اۊیته ني جیک لامؤتا نخش ٚ شين ايسه گه خشن ٚ ورزا ۱۹۸۰ فئلم ٚ دۊرۊن اۊن-أ بازي بۊگۊده. دنيرؤ خۊ حضۊر ٚ وأسي تاکسي راننده (۱۹۷۶)، گوزن ٚ شکارگر (۱۹۷۸)، بيداري‌ئن (۱۹۹۰)، وحشت ٚ تنگه (۱۹۹۱)، اۊميدبخش ٚ دفترچه (۲۰۱۲) ۊ گۊل ماه ٚ قاتلان (۲۰۲۳) فئلمان ٚ مئن اؤسکار ٚ جایزه نامزد بؤبؤسته.
دنيرؤ خۊ درام ٚ نخشان ٚ ره گه خشن ٚ خيابانان (۱۹۷۳)، ۱۹۰۰ (۱۹۷۶)، کؤمدي شاه (۱۹۸۲)، ايته زمات آمريکا دۊرۊن (۱۹۸۴)، برزيل (۱۹۸۵)، مأمۊريت (۱۹۸۶)، فرشته ديل (۱۹۸۷)، آنتاچبلز (۱۹۸۷)، خۊرم ريفئقان (۱۹۹۰)، أ رئک ٚ زيوش (۱۹۹۳)، مخمصه (۱۹۹۵)، کازينؤ (۱۹۹۵)، جکی براؤن (۱۹۹۷)، رؤنين (۱۹۹۸)، جؤکر (۲۰۱۹) ؤ ايرلندي مردأک (۲۰۱۹) ٚ فئلمان ٚ دۊرۊن بازي بۊگۊده تحسين بؤبؤسته ؤ اۊن کؤمدي نخشان ني نيصف شؤ جيويشتن (۱۹۸۸)، عمۊمي أفکار ٚ فريب (۱۹۹۷)، أن-أ تحليل بۊکۊن (۱۹۹۹)، والدين ٚ آشنايي (۲۰۰۰–۲۰۱۰) ؤ کارآمۊج (۲۰۱۵) وأسي مشهۊر ايسه. دنيرؤ برانکس ٚ داستان (۱۹۹۳) جنايي ؤ فئلم ؤ خؤب ٚ چۊپان ٚ جاسۊسي فئلم ٚ مئن ني بازيگري ؤ کارگرداني بۊگۊده. تلويزيؤن ٚ مئن، دنيرو برني مادؤف ٚ نخش ٚ أمرأ دۊرؤغان ٚ جادۊگر ٚ فئلم ٚ مئن حضۊر بيافته.
