Gemini 11 foi unha das misións tripuladas do programa Gemini. A tripulación da Gemini 11 estaba formada por Charles Conrad e Richard Gordon, sendo a tripulación de apoio Neil Armstrong e William Anders.
Desenvolvemento da misión
Gemini 11 foi a novena misión tripulada do programa Gemini. Foi lanzada o 12 de setembro de 1966 ás 14:42:26.546 UTC (9:42:26 EST) desde o Complexo 19 de Cabo Cañaveral e inserido nunha órbita inicial de 160,5 km de perixeo e 279,1 km de apoxeo. A cápsula Gemini atopouse co GATV 11 (Gemini Agena Target Vehicle 11) cinco manobras orbitais e 1 hora e 25 minutos máis tarde. O GATV 11 foi lanzado unha hora e media antes que a Gemini 11. O acoplamento entre as dúas naves completouse ás 11:16 EST, na primeira órbita, e consumindo menos propelente do planeado. Cada astronauta fixo un par de exercicios de acoplamento co GATV 11 para ás 2:14:14 EST deixar o conxunto de naves acopladas nunha órbita de 287 x 304 km mentres os astronautas durmían.
O día seguinte ás 9:44 EST (ás 24 horas e 2 minutos do inicio da misión) a cabina foi despresurizada e os zapóns abertos para o primeiro paseo espacial da misión, levado a cabo por Richard Gordon. A saída, con umbilical, durou 107 minutos, durante os cales recolleu o experimento de micrometeoritos e despregou unha corda de 30 metros entre o GATV e a Gemini 11. A camiñada espacial foi máis dura do esperado, forzou o sistema de soporte vital do traxe de Gordon e deixou sen visión do ollo dereito ó astronauta debido ó esforzo. Conrad ordenou o regreso de Gordon á cabina, que se introduciu nela ás 10:12 EST, pechándose o zapón ás 10:17, represurizándoa. ÁS 11:19 os astronautas abriron de novo os zapóns para expulsar equipo que xa non ían usar.
Despois de durmir, os astronautas acenderon o motor do GATV durante 25 segundos, ás 2:12:41 EST do día 14 de setembro. Co acendido o apoxeo da órbita elevouse ata os 1374,1 km, establecendo un novo récord que só se batería co voo do Apollo 8 cara a Lúa. Tras dúas órbitas usouse de novo o motor do GATV durante 22,5 segundos para devolver as naves a unha órbita de 287 x 304 km. Ás 7:49 EST Gordon levou a cabo unha nova camiñada espacial, cunha duración de 2 horas e 8 minutos, durante a cal realizou diversos experimentos fotográficos. O astronauta regresou á cabina ás 9:57 EST e pouco despois a Gemini 11 separouse do GATV 11, aínda unidos pola corda que Gordon colocara no primeiro paseo espacial. Á distancia máxima de 30 metros que permitía a corda, Conrad manobrou para moverse arredor do GATV, iniciándose a rotación das dúas naves unidas pola corda e producindo unha lixeira "gravidade artificial" debido á forza centrífuga, sendo a primeira vez que se demostrou esta técnica no espazo. Ao principio da rotación producíronse oscilacións que se atenuaron aos 20 minutos. Ao acelerar a velocidade de rotación producíronse novas oscilacións, que de novo cesaron ata que o conxunto quedou estabilizado. Tras unhas tres horas de rotación, as naves separáronse.
Unha das células de combustible da Gemini 11 fallou ás 16:13 EST, co resto de células asumindo a carga extra sen problemas. Ás 4:22 do día 15 de setembro a Gemini 11 atracou de novo co GATV sen usar o radar, avariado previamente. Tras separarse por última vez, a Gemini 11, na súa revolución número 44 arredor da Terra, ás 8:24:03 EST do, acendeu os seus retrofoguetes para iniciar o regreso á superficie. A da Gemini 11 foi a primeira reentrada atmosferica dirixida de maneira totalmente automática dunha nave estadounidense. A cápsula amarou no Atlántico occidental a 24,25° N e 70,0° O, a 4,9 km do punto planeado e ás 8:59:35 EST. A tripulación foi recollida e levada ó portaavións U.S.S. Guam ás 9:23 e a cápsula foi recuperada ás 9:58. O tempo total transcorrido da misión foi de 71 horas, 17 minutos e 8 segundos.
