Is tír san Afraic í Poblacht Djibouti, nó Djibouti de ghnáth. Is í cathair Djibouti príomhchathair na tíre. Tá sí ag críochantacht leis an Eiritré, An Aetóip, agus an tSomáil. Is iarchoilíneacht Fhrancach í.
Bhain Poblacht Djibouti amach a neamhspleáchas ón bhFrainc ar an 27 Meitheamh 1977. Roimhe sin, thugtaí Somálalann na Fraince, agus ina dhiaidh sin Críocha na nAfar agus na nIssa ar an gcoilíneacht. Bhunaigh na Francaigh an choilíneacht anseo sa chéad leath den naoú haois déag, ach bhí an t-ainm sin Djibouti ann roimhe sin féin. Bhí ceangal dlúth trádála ag muintir Djibouti le Leithinis na hAraibe le fada, agus b'iad an chéad dream san Afraic a ghlac le hIoslam. Moslamaigh iad 94 % de mhuintir na tíre, agus is Críostaithe iad an chuid is mó den fhuíoll.
Is iad an Fhraincis agus an Araibis teangacha oifigiúla Djibouti, ach is iad na hIssa agus na hAfar an dá ghrúpa eitneacha is mó. Treibh Shomálach iad na hIssa, agus an tSomáilis á labhairt acu ó dhúchas. Maidir leis na hAfar, tá teanga dá gcuid féin acu. Teanga Chúisiteach í an teanga Afar, ach níl sí intuigthe ag lucht labhartha na Somáilise.
