Colton Haynes

1988-2009: primelus añus i encetus comu moelu i atol

Colton Lee Haynes tuvu nacencia el 13 de júliu de 1988 ena ciá de Wichita nel estau de Kansas (Estaus Uníus), iju de William Clayton Haynes i Dana Denise Mitchell; es d'ascendencia británica. Duranti la su infancia, creció juntu los sus pairis i los sus quatru helmanus nuna granha assitiá en Andale; nuna entrevista, aseguró que la su familia siempri tuvu «un espíritu libri hippie» i se consieraban nómadas. Ebiu a estu, vivió pol cortus periodus en diversus lugaris delos Estaus Uníus, comu Arkansas, Nuevu Méhicu, Tehas i Florida, amás que estuyó en tres escuelas distintas. Pesi alos valoris que la su familia l'enculcaba, afirmó que siempri tuvu una mala atitú: «Era el típicu zagal que no sonría palas fotus de Naviá, era patéticu enos deportis i odiaba abondas cosas». Acontinó iziendu que eventualmenti començó a maural i alos quinzi añus se muó a Nueva York pa buscal oportuniais una vezi que culminó los sus estuyus en Tehas; estu úrtimu ocurrió luegu d'abel ruchau un reinau ena su escuela dondi fue coronau comu «el que mui probablimenti será famosu». Estandu en Nueva York, enició una carrera comu moelu, dondi posó pa campañas de Kira Plastinina, J. C. Penney i Ralph Lauren. Empeçó a ruchal populariá a meyaus de 2006 tras aparecel ena portá dela revista gay XY i más tardi tras sel el moelu prencipal duna sesión fotográfica de Bruce Weber pa Abercrombie & Fitch.

En 2007, apareció ena película Transformers, inque no fue acreditau; el mesmu añu, enterpretó a Brandon Fox nun episodiu dela serii CSI: Miami. Igualmenti, protagonizó el videoclip dela canción «I don't love you» dela banda My Chemical Romance i audicionó pal rol de Edward Cullen ena película Twilight, adatración cinematográfica dela novela omónima escrivía pol Stephenie Meyer; inque, finalmenti el papel lo desenvolvió Robert Pattinson. En 2008, izu de moelu en varias campañas de Verizon Communications i apareció en revistas comu Teen Vogue i Arena. Amás, atuó nun episodiu delas seriis Privileged i Pushing Daisies. En 2009, atuó ena película Always and Forever comu Scott Holland i nun episodiu dela serii Melrose Place comu Jessie Roberts.

2010-ogañu: Teen Wolf i Arrow

En 2010, formó parti del elenxu prencipal dela serii del canal ABC, The Gates, dondi enterpretó a Brett Crezski, un fuburola i licántropu. Nel su episodiu estrenu, tuvu ábate cincu millonis en audiencia; nostanti, fue cancelá tras la su primel temporada ebiu alos bahus índiçis d'audiencia. El mesmu añu, protagonizó la serii Look: The Series, basá ena película omónima de 2007 col rol de Shane, un típicu estudianti de secundaria; nostanti, la serii fue tamién cancelá tras la su primel temporada. En 2011, fue selecionau pa enterpretal a Jackson Whittemore ena serii de televisión de MTV, Teen Wolf, basá nel filmi omónimu de 1985. Perteneció al elenxu prencipal duranti las dos primelis temporadas, que tuverun una duración de dozi episodius ca una. Essi mesmu añu tamién apareció nun episodiu dela serii The Nine Lives of Chloe King i gravó un cortometrahi llamau Charlie Brown: Blockhead's Revenge, dondi izu el papel de Linus van Pelt. En 2012 apareció nel videoclip dela canción «Trouble» de Leona Lewis i en 2013 nel de «Gold» de Victoria Justice, en dambos dos siendu el noviu delas respetivas cantantis.

En 2013, fue elegíu pa enterpretal a Roy Harper ena serii de The CW, Arrow. La su estaía ena serii s'estendió pol más de 39 capítulus alargu delas quatru primelis temporadas. Tras la su retirá dela serii, s'abstuvu de desenvolvel papelis mayoris en seriis o película pol más dun añu. En 2016, reapareció nun episodiu de Arrow comu envitau i posteriolmenti essi añu tamién fue envitau especial en Scream Queens.

El 5 de mayu de 2016, concedió una entrevista a Entertainment Weekly dondi espricó que s'abía tomau un descansu del mundu dela atuación pol sufril dun trastornu d'ansieá. Assin, se declaró abiertamenti omosesual. El 19 de hebreru de 2017, confirmó la su relación col florista Jeff Leatham, con quien se comprometió más tardi el 12 de marçu dessi añu. En noviembri de 2017, Haynes fue nominau al "OUT100" dela revista Out pa 2017 en reconocimientu dela su salía, la su autorrealización i el su trabahu. En abril de 2018, Haynes solicitó el divorciu endispués dun matrimoñu de seis mesis con Leatham.

• En Commons ai conteníu multimedia sobre Colton Haynes.

Prantilla:IMDb name

• Colton Haynes en Twitter (en ingrés).