Penango

Penango (malaje Penang, plenforme Pulau Pinang) estas unu el la 13 subŝtatoj, kiuj konsistigas Malajzion, kaj havas la nomon de ĝia precipa insulo, Penango. La subŝtato kovras areon de 1 048 kvadrataj kilometroj - parte en la insulo Penango ĉe la nordokcidenta marbordo de la malaja duoninsulo, parte en la neinsula teritorio Seberang Perai, kiu estas parto de la malaja duoninsulo kaj de duoninsula Malajzio, kaj parte en iuj kromaj insuletoj. En sia historio multajn jarojn kolonio de Britio, politike ĝi unu el nur 4 el la 13 malajziaj subŝtatoj kiuj ne estas konstitucia monarkio regata de sultano: la ŝtatestro, malaje nomata Yang di-Pertua Negeri, rekte estas nomata fare de la Reĝo de Malajzio (la Yang di-Pertuan Agong). Laŭ la stato de 2020 en Penango vivis 1 740 400 loĝantoj sur areo de 1 031 kvadrataj kilometroj, kio rezultigas loĝdenson de 1 688 loĝantoj/km² - la teritorio do estas altgrade urbigita kaj en komparo al multaj aliaj partoj de Malajzio tre dense loĝata. Administra centro estas la urbo Ĝorĝtaŭno (George Town).