Darn hir o ddeunydd sy'n cael ei gwisgo o amgylch y gwddf ac wedi'i glymu mewn cwlwm o dan yr ên yw tei. Fel arfer caiff ei wisgo gyda chrys â choler, wedi'i guddio o dan y coler ac yn gorchuddio'r agoriad â botymau. Gellir cysylltu'r tei â blaen y crys gyda phin tei neu glip tei.
Yn draddodiadol, mae tei yn rhan o wisg gwrywaidd, ond weithiau cânt eu gwisgo gan fenywod, er bod hynny fel arfer yn rhan o ryw lifrai. Nid oes gan dei unrhyw ddiben penodol ac eithrio weithiau yn rhinwedd ei batrwm i ddangos aelodaeth o ryw grŵp neu sefydliad – clwb, ysgol, neu gatrawd, er enghraifft. Fodd bynnag, mewn rhai achlysuron ffurfiol mae tei yn rhan ofynnol o wisg dyn. Amrywiad o'r tei hir yw'r tei bô, sydd yn aml â goblygiadau hyd yn oed yn fwy ffurfiol.
Daeth teiau fel y gwyddom amdanynt heddiw i fodolaeth yn y 1870au. Fe wnaethant ddisodli'r crafatiau roedd dynion Ewropeaidd wedi'u gwisgo o amgylch eu gyddfau ers y 17g.
