Jasper Johns

Arlunydd o'r Unol Daleithiau yw Jasper Johns (ganwyd 15 Mai 1930) a gysylltir â'r mudiad celfyddyd bop.

Ganwyd yn Augusta yn nhalaith Georgia. Astudiodd am flwyddyn ym Mhrifysgol De Carolina cyn iddo symud i Ddinas Efrog Newydd i weithio fel arlunydd.

Ym 1954 fe gychwynnodd ar ei gyfres enwog o beintiadau o'r faner Americanaidd. Peintiodd destunau dau ddimensiwn megis baneri, mapiau, labeli, rhifau, a llythrennau mewn lliwiau syml a gyda thechneg llosgliw, hynny yw pigmentau wedi cymysgu â chwyr poeth. Yn ôl beirniad ym mhapur newydd The Times, ymddengys ei waith petai'n "ymdrech i gynhyrchu peth prin a gwerthfawr drwy ymdrafferthu â gwrthrych sydd yn y bôn yn anystwyth, yn fud ac yn anniddorol".

Ym 1961, dechreuodd Johns osod gwrthrychau ar ei gynfasau. Newidiodd ei arddull yn y 1970au gyda'i crosshatchings: casgliadau o linellau cyfochrog, weithiau yn ddu a gwyn. Yn y 1980au, darluniodd elfennau ffigurol a chyfeiriadau at ei fywyd yn ei beintiadau.

Derbyniodd Wobr Gelfyddyd Wolf ym 1986, wobr beintio y Praemium Imperiale ym 1993, a Medal Rhyddid yr Arlywydd yn 2011. Cynhyrchwyd y ffilm ddogfen Jasper Johns: Ideas in Paint amdano ym 1989.