Math o ddynodwr a ddefnyddir i gyfeirio at lenyddiaeth seryddol ac astroffisegol yw Bibcode. Defnyddir Bibcodes yn benodol gan y cronfeydd data seryddol SIMBAD ac NED, yn ogystal â'r System Data Astroffiseg, cronfa ddata gynhwysfawr o lenyddiaeth ym meysydd seryddiaeth ac astroffiseg. Cyflwynwyd y system Bibcode ym 1995.
Mae Bibcode yn cynnwys 19 o nodau (llythrennau, rhifau, atalnod, arwydd canran, a cholon) ac mae ganddo'r fformat:
- YYYYJJJJJVVVVMPPPPA
Lle:
- YYYY = blwyddyn y cyhoeddiad
- JJJJJ = cod ar gyfer y ffynhonnell (cyfnodolyn, llyfr, traethawd ymchwil ac ati)
- VVVV = rhif cyfrol y cyfnodolyn
- M = adran neu ran o'r cyhoeddiad
- PPPP = rhifau tudalen
- A = llythyren gyntaf cyfenw'r awdur a enwir gyntaf. Os na ellir pennu hyn, defnyddir colon (:). Nid yw rhai llyfrau'n cydymffurfio â'r fformat arferol; yn yr achos hwnnw defnyddir arwydd canran (%).
