Malmignattu

U malmignattu

Latrodectus tredecimguttatus Classificazioni scentifica Regnu Animalia Divisioni Arthropoda Classa Arachnida Ordini Araneae Famiglia Theridiidae Genaru Latrodectus Nomu binuminali Latrodectus tredecimguttatus
Linnaeus, 1753

U malmignattu (o malmignattulu) (Latrodectus tredecimguttatus) hè un tipu di ragnu chì faci parti di a famiglia di i Theridiidae. Si scontra in tutta a rigioni di u Mediterraniu ma dinò in u nordu di l'Africa, in Asia Cintrali, in Russia suttana è in l'Isuli Canarii. Pò essa priculosu pa l'omu. Era ancu cunnisciutu da i grechi à tempi antichi antichi. U malmignattu hè neru, è t'hà à spessu trè paghji di tacchi rossi, calchì volta chjirchati bianchi o giaddi. I patti sò forti è neri. U malmignattu hè discrittu à spessu com'è pussidendu tredici tacchi rossi. Ma esistini calchì variazioni, apposta chì pò accada chì 'ssi tacchi fussini bianchi.

Ci hè un impurtantu dismurfisimu sessuali ind'è u malmignattu, postu chì a femina (8-18 mm) hè bedda più maiori ch'è u masciu (3-6 mm). L'adulti masci si trovani da maghju à sittembri, quandu i femini inveci si scontrani da maghju à nuvembri. U malmignattu cattura i so predi vivi par via di una ragnata abbastanza maiori, ma bedda piattata è si nutrisci par u più d'insetti. Accadi chì l'accupiamentu fussi priculosu pà u masciu, chì pò essa divuratu tandu da a femina.

Vivi in ragnati moltu resistenti incù una forma irregulari in ariali à machja meditarrania bassa, à spessu aridi è pitrosi, frà sassa è muretti; moltu raramenti u malmignattu si pò truvà vicinu à i casi di campagna.

U malmignattu hè vilanosu, è una pizzicatura pò ancu essa murtali. Ci vò d'andà subitu à u spidali o à a clinica. U vilenu agisci da 10 minuti à un'ora. Ma sola a femina hè vilanosa.