Cleopatra

Orighjine famigliale

Cleòpatra era figliola di u faraone Tolomeu XII Aulete è d'una donna scunnisciuta. Certi storichi cunsidereghjanu Cleopatra cum'è figliola di l'omonima Cleopatra V Trifena, surella è unica moglia cunnisciuta di Tolomeu XII, ma u storicu anticu Strabone dice indirettamente ch’ella era una figliola illeghjittima. Un'antra teoria dice ch'è a mamma di Cleopatra era una donna d'orighjine egizziana, prubabilmente membru di a famiglia di u gran sacrificadore di Ptah, cù radiche sia egizziane sia maceduniane, vistu u ligame di Cleopatra cù a cultura lucale, micca cumunu trà i Tolomei. Sempre sicondu a testimunianza di Strabone, Tolomeu XII ebbe solu una figliola legitima, Berenice IV (da Cleopatra VI), duie figliole illeghjittime (Cleopatra è Arsinoe IV) è dui figlioli illegittimi (Tolomeu XIII è Tolomeu XIV).

Cleopatra appartenia à l'antica famiglia di i Tolomei (o Lagidi) è era dunque discendente di u diaducu Tolomeu I Sotere, fundatore di a dinastia è amicu di zitellina di Lisandru Magnu; discendia, in più, attraversu a so antenata Cleopatra I, chì avia spusatu Tolomeu V Epifane, ancu da Seleucu I Nicatore, un antru diaducu, pudendu cusì vantà si d'orighjine nobile grecomaceduniane. Era imparintata cù Tolomeu di Cipru è Cleopatra Berenice, mezu fratelli di u babbu, ma dinò cù Tolomeu IX, u so missiavu, è, grazia à matrimonii dinastichi, cù parechji membri di a dinastia seleucida.

Ghjuventù (70/69-51 a.C.)

Cleopatra nascì trà a fine di l'annu 70 è u 69 a.C. (di sicuru nanzu à u 14 di ghjennaghju do u 69 a.C. è prubabilmente durante o dopu u mese di dicembre di l'annu 70 a.C.), in u 12esimu annu di regnu di u so babbu. In u periodu dopu, da u 68 a.C. à u 59 a.C., nascenu d'altre mamme scunnisciute a surella Arsinoe IV è i fratelli Tulumeu XIII è Tulumeu XIV. Quand'ella era zitella, Cleopatra studiò in a Biblioteca è u Museiu d'Alissandria, è si sà chì u so tutore era Filostratu, chì l'hà iniziata à a filosofia, à a retorica è à l'uratoria; a so furmazione era assai larga è abbracciava ancu a medicina, a fisica è a farmacolugia. Sì sà dinù chì Cleopatra, cum'è reghjina, era capace di parlà, è forse dinù di leghje è scrive, e lingue di «Etiopi, Trogloditi, Ebrei, Arabi, Siri, Medi, Parti è assai altre», cum'ellu ci dice Plutarcu; trà ‘ssi altri idiomi ci eranu di sicuru u grecu anticu, l'egizianu è u latinu è, prubabilmente, altre lingue nordafricane.

In u 59 a.C., u babbu, Tulumeu Aulete, ottense u ricunniscimentu di amicus et socius populi romani, grazia à u sustegnu di i triunviri Ghjuliu Cesaru è Pompeu. Ma, durante u veranu di u 58 a.C., u rè fu custrettu à lascià l'Egittu per via di rivolte caghjunate da a crisa ecunomica crescente di u regnu (cù 'aumentu di l'impositi) è per via di a mancanza d’intervenzione per pruteghje u regnu cliente di Cipru da l'invasione rumana di l'isula; in listessu annu, l’armata rumana cundutta da Marcu Porciu Catone strappò Cipru à u fratellastru di Tulumeu, Tulumeu di Cipru, chì si suicidò per ùn esse pigliatu.

Tulumeu Aulete si rifughjò tandu in Roma, è Cleopatra u seguitò. Intantu, in Egittu, l'Alissandrini mettenu à u putere a moglia di Tulumeu, Cleopatra V Trifena, è a figliola maiò, Berenice IV; ma Trifena murì pocu dopu è a figliola di Tulumeu si ritruvò sola monarca di u regnu. Berenice si maritò tandu cù u principinu seleucide Seleucu Kybiosaktes, chì murì prestu, si dice avvelenatu da a moglia per via di a so incapacità à guvernà; dopu, a principessa si maritò torna, ‘ssa volta cù Archelau, un prete di Cappadocia. Per ripiglià u tronu, Tulumeu dumandò aiutu à i Rumani, chì mandonu Aulu Gabiniu, à u quale Tulumeu prummisse una ricumpensa di deci milla talenti. Gabiniu ghjunse in Egittu è pigliò subitu Archelau, ma, pensendu chì una vittoria troppu rapida li faria guadagnà pocu, u liberò, dicendu ch'ellu era fughjitu. À a fine, Gabiniu riescì à vince è tumbà Archelau, è Berenice fù cundannata à morte da u so babbu stessu, chì vultò in Egittu à tempu à Cleopatra in u 55 a.C. In quelli anni, Cleopatra vidì per a prima volta Marcu Antoniu, un ghjovanu nobile rumanu, tandu à u serviziu di Gabiniu cum'è cummandante di cavalleria, cù u quale averà dopu una relazione d'amore impurtante.

Dopu à u ritornu di Tulumeu in Egittu, si prisentò u prublema di a successione: a maiò di i so figlioli era Cleopatra, ma per evità prublemi per via di u fattu ch'ella era donna, Tulumeu scelse di nominà la coerede cù u primu figliolu masciu, Tulumeu XIII, dumandendu in u so testamentu chì u populu rumanu fussi guardianu di i dui zitelli dopu a so ascesa à u tronu. In u 52 a.C., i quattru figlioli di u rè ricevenu l'appellativu di dii nov è fratelli amant (Theoi Neoi Philadelphoi) è, à quellu stessu periodu, Cleopatra fù assuciata à u tronu incù à u so babbu, assicurendu una successione ordinata, postu chì u figliolu masciu era sempre un zitellu.

Primi anni è esiliu (51-48 a.C.)

Tolomeu XII morse di malatia in veranu di u 51 a.C. Cleopatra u succidì incù u fratellu di dece anni Tolomeu XIII, ch'ella duvia marità, secondu à a tradizione chì a dinastia tolemaica avia principiatu cù Tolomeu II è Arsinoe II, ripigliendu l'usu di l'antichi faraoni. Eppuru, 'ss'unione ùn ebbe locu tandu, è forse mancu dopu. Cleopatra pigliò subitu u titulu di Φιλοπάτωρ (Philopátor, «amante di u babbu»), in onore di u so babbu mortu. Pare chì in un prima mumentu Cleòpatra avissi fattu in modu di ùn sparghje a nutizia di a morte di u babbu, forse per cunsulidà u so putere, tantu chì in Roma, a morte di Tolomeu fù cunfirmata solu à a fine di lugliu. Malgradu e vuluntà di u babbu, a ghjovana reghjina dicise subitu d'accintrà u putere in e so mane è di mette da cantu Tolomeu XIII, sempre zitellu: aghjustò furmalmente à u so titulu l'aghjettivu Θεά (Theá, «divina»), diventendu Theà Philopátor («divina amante di u babbu»), per mette in risaltu a so successione diretta da Tolomeu XII, è feci caccià u nome di u fratellu da i ducumenti ufficiali finu à u 50 a.C. Travagliò dinù per circà u sustegnu in l'Altu Egittu, guvernatu da l'epistrátegos Callimacu, induve u babbu avia gosu d'una grande pupularità; una bona occasione si prisentò quand'è u toru santu d'Api morse in u 52 a.C., è l'annu dopu, à a so ascesa à u tronu, i preti ne truvonu unu novu, chì fù cunsacratu u 22 di marzu di quell'annu à Ermonti, in presenza di a reghjina.

In a seconda mità di u 50 a.C., però, l'Egittu fù culpitu da una carestia, per causa di una sicchina di u Nilu: i nemichi di Cleopatra in Alessandria, capitale è centru di u putere egizianu, prufittonu di l'occasione per fà appruvà un decretu u 27 ottobre, in nome di Tolomeu XIII è Cleopatra, chì obligava i marcanti à cunduce e scorte di granu da l'Altu Egittu versu a capitale, sottu pena di morte. Indebulendu u territoriu induve Cleopatra era più forte, i curtighjani circavanu di culpisce a pusizione di a reghjina, chì trà u 49 a.C. è u 48 a.C. fù custretta à lascià Alessandria, rifughjendu si in Tebaide. Più tardi, però, a regina dicise di lascià dinù l'Altu Egittu è di veranu di u 48 a.C. scappò incù à a so surella minore Arsinoe IV in Siria meridionale, induve u babbu avia avutu assai amichi, cù u scopu di furmà un’armata per ripiglià u tronu.

Guerra civile è ripresa di u putere (48-47 a.C.)

A guerra civile trà i figlioli di Tulumeu Auletu era oramai imminente, quand'ellu ghjunse in Egittu di settembre di l'annu 48 a.C. u generale rumanu Gneu Pompeu Magnu: quellu, battutu da Gaiu Ghjuliu Cesaru in a battaglia di Farsalu, sperava di riceve esiliu da Tulumeu XIII, vistu u bon raportu ch'ellu avia avutu cù u babbu Tulumeu XII; malgradu quessa, vista a so recente scunfitta, accoglie lu averia messu u rè egizianu in una pusizione svantaghjosa. Tulumeu XIII è i so cunsiglieri, cù à capu l'eunucu Putinu, temendu ancu chì Pompeu pudissi piglià u cuntrollu di i Gabiniani stazziunati in Alessandria è cullà à u putere in Egittu, decisenu di fà lu tumbà da l'egizzianu Achilla è da u rumanu Luciu Settimiu, ancu cù a speranza di guadagne si u favore di Cesaru. In più, Tulumeu fece imprighjunà l'exi consulu Luciu Corneliu Lentulu Crure, chì morse pocu dopu.

Quandu u vincitore di Farsalu ghjunse, Tulumeu li prupone a testa di Pompeu, ma e so speranze fubbenu vane, postu chì Cesaru ùn appruvò micca l'uccisione d'unu di i so cuncitadini. Cù u so più grande rivale oramai mortu, Cesaru decise di firmà in Egittu per mette in ordine a situazione trà Tulumeu è Cleopatra, appughjatu nantu à u testamentu di u babbu, chì dava à u populu rumanu a custodia annantu à elli: in qualità di consulu, in fatti, Cesaru urdinò chì i dui rivali smantellessinu l'armate è risolvessinu a cuntruversia à traversu a ghjustizia. Tuttavia, Cesaru ùn fù per nunda ben vistu da l'Egizziani: si prisentò in Alessandria cum'è un consulu in visita in una cità sottumessa è rivindicò i soldi chì Tulumeu XII li avia prummessu in u 59 a.C.; per quessa ci fubbenu sullevazione pupulare chì caghjunonu à a morte di parechji di i so suldati.

I dui rivali, dunque, ghjunsenu in Alessandria, Tulumeu mantinendu però a so armata è Cleopatra prisentendu si dirittamente davanti à u dittatore à l'insaputa di u fratellu; à l'iniziu di nuvembre, quantunque, tremindui fubbenu di novu numinati da Cesaru corigenti è, probabilmente per risponde à a vulintà di Tulumeu XII, à listessu mumentu si fubbenu maritati; à listessu tempu, u consulu dete l'isula di Cipru à i fratelli più chjuchi di Cleopatra è Tulumeu, Arsinoe è Tulumeu minore. Eppuru, intantu, Putinu, u regente di Tulumeu XIII, avia mandatu ordine à u generale Achilla perchè facia vene l'armata da Pelusiu à Alessandria, per scunfighje u consulu è liberà Tulumeu da a so influenza; Achilla, aiutatu da i Gabiniani, ghjunse in cità è riesci di manera faciule à cunquistà a maiò parte d'ella, principiendu l'assediu di u palazzu reale, induve Cesaru si difendia cù i so pochi suldati. U consulu urdinò dunque di brusgià a flotta egizziana in u portu, incausendu a distruzzione di una grande parte di Alessandria, cumpresa a grande bibliuteca; in più, avendu scupertu e trame di Putinu è temendu ch’ellu pudissi fà fughje Tulumeu da u palazzu, u fece arristà è tumbà.

Sughjornu in Roma è morte di Ghjuliu Cesaru (46-41 a.C.)

In u mese di lugliu di u 46 a.C., Ghjuliu Cesaru celebrò u so trionfu; Cleopatra è Tolomeu XIV si culluchetinu in Roma cum'è invitati; punitinu a so residenza in una di e case di u dittatore nant'à u Gianiculu, nant'à a sponda diritta di u Tevere, è à quell’occasione i dui monarchi fubbenu chjamati reges è socii et amici populi Romani. À quell'epica risale a custruzzione di u tempiu di Venere Genitrice, induve, accantu à a statua di a dea, Cesaru ci fece mette una di bronzu rapprisentendu Cleopatra in i panni d'Iside, è l'introduzione di u calendariu ghjulianu (entratu in vigore u 1 di ghjennaghju di u 45 a.C.), prumossu sopratuttu da i studii di u scinziatu alissandrinu Sosigene, cunnisciutu da Cesaru in Egittu è venutu in Roma cù i monarchi egizziani.

Durante u so sughjornu in Roma, a reghjina ùn riescì micca à fà ricunnosce ufficialmente da u dittatore u figliolu natu da a so rilazione; in ogni modu Cleopatra ùn passò micca inussirvata è a so presenza cuntribuì forsi à aggravà i malumori contru à Cesaru, chì copu cundussinu à a so uccisione: a reghjina avia infatti urganizatu una corte soia d’ispirazione orientale è era per quessa malvista da parechji membri di l’aristucrazia latina.

Ùn si sà s'è Cleopatra, Tolomeu è Cesarione firmonu in Roma per dui anni di fila o s'elli vultonu in Egittu quandu Cesaru partì per a campagna ispanica à a fine di u 46 a.C., per vultà dopu in a capitale à u so ritornu l’annu dopu. Sicuramente a famiglia reale era in Roma quandu u dittatore fù assassinatu u 15 marzu di u 44 a.C. è ci firmò sin'à u mese d'aprile, forse spirendu di fà ricunnosce un'eredità à Cesarione; senza avè ottinutu successu, i Tolomei vultonu definitivamente in Alessandria, induve pocu dopu Tolomeu XIV morse, forse fattu tumbà da a stessa Cleopatra incù vileni.

À quellu puntu fù elevatu à cuguvirnante Tolomeu XV Cesaru, di solu trè anni, ricunnisciutu ufficialmente da Roma solu in u 43 a.C. da a manu di Publiu Corneliu Dolabella, chì cumbattia i cesaricidii in Oriente.

In fatti, dopu à l’assassiniu di Cesaru, Gaiu Cassiu Longinu, unu di i cuspirati, andò in Asia cù una armata, ma fù subitu seguitatu da u cesarianu Dolabella. Cleopatra ricevite richieste d’aiutu militare da tramindui, dicidendu di dà sustegnu à Dolabella per uttene u ricunniscimentu di u figliolu cum'è so cuguvirnante; a reghjina mandò tandu in aiutu di u generale e legione chì Cesaru avia lasciatu in Egittu, diventate intantu quattru, sottu à u cumandu di Aulu Allienu, è avaria vulsutu mandà ancu una flotta, ma i venti ne impedinu una partenza rapida.

Allienu, però, ghjuntu in Ghjudea, si truvò contru à l’armata di Cassiu è dicidò di affiancà si ad ellu; Dolabella, oramai assidiatu in Laodicea, si suicidò, rindendu cusì vanu l'inviu di a flotta egizziana.

Quissa situazione espunì Cleopatra à un periculu seriu: tutti i suvrani orientali si eranu digià affiancat à Cassiu, chì, avendu bisognu di rifurnimenti è soldi, fighjulava versu l'Egittu cù invidia, quellu regnu essendu u più riccu di 'ss'areale. Ancu u guvernatore tolemaicu di Cipru, Serapione, era passatu cù i cesaricidii, mandendu li aiutu navale; probabilmente Arsinoe, a surella di Cleopatra esiliata in Efesu, era daretu à stu tradimentu, cù a speranza di pudè piglià per ella u tronu d'Alessandria.

Eppuru Cassiu ùn si fidava di a reghjina, sapendu chì in Egittu si preparava una flotta di guerra; mandò dunque Luciu Staio Murcu nant’à u Capu Tenaru, à l'estremità sud di a Grecia, per impedì à l'Egizziani d'unisce e so truppe cù quelle d’Antoniu è Ottavianu, chì intantu eranu sbarcate in Macedonia.

Cleopatra, infatti, fece parte a flotta da Alessandria pocu dopu, cù ella stessa à capu di quell’armata. Una timpesta in u Mediterraneu impedì à l’Egizziani di ghjunghje à tempu per a b]]attaglia, ma i triumviri scunfighjitinu ugualmente i cesaricidii in a battaglia di Filippi, d'uttobre di u [[42 a.C., è Brutu è Cassiu si suicidonu.

À a fine di quell'annu, a Republica Rumana era cusì divisa in dui: Ottavianu pigliò u cuntrollu di l'Occidenti è Antoniu di l’Oriente.

Marcu Antoniu è u cunsolidamentu di u putere (41-37 a.C.)

Antoniu à quellu puntu era a figura a più impurtante di u mondu rumanu: stabilì u so centru di cummandu in Atena è da culà cullò versu i territorii orientali induv'elli avianu agitu l'assassini di Ghjuliu Cesaru; era sempre legalmente maritatu cù Fulvia, ma intraprese una rilazioni persunale cù Glafira, eterosessuale è cumpagna (o moglia) d’Archelao, prete di Comana, è numinò rè di Cappadocia u figliolu d’ella, chjamatu anch’ellu Archelao. Di veranu di u 41 a.C., Antoniu ghjunse in Tarso è da culà mandò lettere à Cleopatra per chjamà la vicinu à a so corte, ma a regina l'ignurò; solu quandu l’emissariu d’Antoniu, Quintu Delliu, si cullucò persunalmente in Alessandria per vede à Cleopatra, si cunvinse à cullà in Tarso.

Antoniu avia chjamatu a regina per dumandà li spiegazione in quantu à a so pusizione durante a guerra contr’à l’assassini di Cesaru, ma ci era prubabilmente ancu un mutivu persunale.

A reghjina partì dunque à bordu di u so thalamegós (θαλαμηγός) è ricullò u fiume Cidnu sin’à scuntrà u triumviru, intrendu in Tarso in modu triunfale per mustrà tutta a so ricchezza; per parechji ghjorni fubbenu ospitati banchetti lussuriosi à bordu, cù l’intenzione, riesciuta, d’impressiunà è cunquistà Antoniu è tuttu u so vicinatu.

Cleopatra riescì facilmente à disculpà si da l'accuse d’ave aiutatu Cassiu è sfruttò l'occasione per eliminà rivali putenziali: prima di tuttu, feci assassinà da Antoniu a so sola surella restante, Arsinoe, sempre in Efesu, è feci arrestà sia u gran prete d'Artemide, dopu liberatu, sia u guvernatore di l’isula di Cipru, Serapione, accusati d’ave vulsutu sustene a principessa in esiliu; dopu, a regina feci tumbà ancu un feniciu d'Aradu chì pretendia esse u defuntu Tolomeu XIII.

Cleopatra vultò dunque in Egittu, in Alessandria, è invitò Antoniu à a so corte; u triumviru ghjunse versu u mese di nuvembre di u 41 a.C. è diventò subitu pupulare in a capitale, postu ch’ellu avia participatu à a guerra di risturazione di Tolomeu XII quattordeci anni nanzu.

In quellu periodu, Cleopatra avia di fronte à ella un prublema di natura dinastica: ella è u so figliolu eranu diventati l’unichi eredi restati di i Tolomei (sicondu certe voce, era forse incinta d’un secondu figliolu di Cesaru, ma avaria fattu un sconciu spuntaneu dopu à l’assassiniu), è sta situazione mettia sia elli sia u regnu in un statu di periculu putenziale; in più, ella stessa, essendu donna, era in una pusizione difficiule, postu ch’ella ùn avia micca un maritu chì regnava cun ella, com'era l'antica tradizione.

Per tutti issi motivi, prubabilmente, a reghjina scelse d'avvicinà si à Antoniu, persunaghju maiò di a scena pulitica di Roma, senza u quale u regnu d’Egittu ùn pudia sopravvive: era dunque un mezu per assicurà si l'appoghju esternu di a Republica, è per avè eredi novi da un omu degnu d'una reghjina.

Espansiunisimu egizzianu (37 a.C.-33 a.C.)

Dopu à l'incontru di Tarantu, Antoniu duvite cullà torna in Oriente per mette fine una volta per tutte à u cunflittu cù l'Iraniani; lasciò Ottavia, torna incinta, in Italia è mandò u legatu Gaiu Fonteiu Capitone in Egittu, per fà li cunvocà di pettu Cleopatra in Siria, cù l'intenzione di discutà di u finanzamentu di a so campagna contr'à l'Iranu è di u regnu d'Erode. L'incontru si feci à Antiocchia è, in quella occasione, Antoniu deti à Cleopatra parechji territorii chì facianu parte di a vechja sfera d’influenza tolemaica: a Fenicia, senza però e cità di Tiru è Sidone, ma cù Tolemaide di Fenicia, Gaza, Biblu è forse ancu Ascalona, patria d’Erode è per quessa subitu restituita; a Celesiria, terra disputata trà i Tolomei è i Seleucidi da seculi, cumpresa a cità d’Apamea; a parte di a Ghjudea intornu à a cità di Ghjericu, impurtante per a pruduzzione di prudutti vegetali; a parte di u regnu nabateu, à u nordu di a penisula araba, vicinu à u golfu d’Aqaba, cumpresa a cità di Berenice; parte di a Cirenaica è certi distretti di l'isula di Creta, cumpresi e cità tolemaiche d’Itanos è Olunte. U cuntrollu nant’à ‘ssi territorii era assai spessu solu nominale, postu chì a reghjina lasciava à a catena di cummandu rumana sott’à u cuntrollu d’Antoniu a tacca d'amministrà li; quantunque, u guadagnu ecunomicu chì u regnu d'Egittu ne tirava era assai altu, tantu chì Cleopatra principiò à cuntà l'anni dapoi u 36 a.C. cù una doppia datazione, cum'è ne testimunieghjanu e munete di l'ultima parte di u so regnu.

À Antiocchia, in più, Antoniu cunniscì per a prima volta i so dui figlioli coppii è li ricunniscì cum'è soi. À Roma, tuttu què fù adupratu da Ottavianu per fà parè Antoniu in mala luce à l'ochji di l'opinione pupulare, postu chì una reghjina straniera pigliava sempre più putere à spese di a Republica; in più, Antoniu prisintò a surella Ottavia cum’è una donna virtuosa è abbandunata, è onorò ella è a moglia Livia cù privileghji guasgi divini è cù statue, prubabilmente alzate in u Foru di Cesaru, in oppusizione cù a statua stessa di Cleopatra.

Di veranu in u 36 a.C., Antoniu principiò a so campagna contr'à l'Iranu è Cleopatra l'acumpagnò sin'à lEufrate, prubabilmente sin’à a cità di Seleucia à u Zeugma; dopu a reghjina vultò in Egittu, visitendu durante u viaghju certi territorii acquistati di pocu: passò per Apamea è Damascu, attraversò i territorii d'Erode, accumpagnata cù tutti l'onori da u rè, chì li deti a cità di Ghjericu, è rientrò infine in Egittu da a cità di Pelusiu. U so ritornu era statu necessariu per via di a gravidanza avanzata: d'estate, vensi à u mondu Tolomeu Filadelfu, u terzu figliolu avutu cù Antoniu.

Ma a spedizione militare d'Antoniu si svelò esse un fiascu è u generale rumanu si ritirò di dicembre, dopu à avè persu un numeru impurtante di suldati, in u locu di Leukè Kome (in grecu anticu: Λευκὴ κώμη?, leukḕ kṑmē, "paese biancu"), trà Beritu è Sidone, è quì aspittò a ghjunta di Cleopatra, chjamata in aiutu. A reghjina ghjunse è in u 35 a.C. Antoniu decise d'intraprende una nova campagna, sta volta contr’à l'Armenia, alleata di l'Iranu; a spedizione fù urganizata à Antiocchia, ma Ottavia ghjunsi tandu in Atena per pruvà di riavvicinà si à u maritu, purtendu cun ella truppe rumane chì però Antoniu ricusò, vultendu invece in Alessandria cù Cleopatra è abbandunendu i so scopi di guerra.

Scontru è guerra cù Ottavianu (33-31 a.C.)

U primu di ghjennaghju di l'annu 33 a.C., diventonu consuli Luciu Vulgaciu Tullu è Ottavianu; quellu fece un discorsu in Senatu accusendu apertamente Antoniu riguardu à a gestione di i territorii urientali di a Republica, ma si dimissi da a carica quellu stessu ghjornu, vultendu à a so campagna in Illiria. Nanzu à a fine di l'annu, dinù, Antoniu numinò ufficialmente Ghjuliu Cesariu (Cesarione) cum'è unicu erede leghjittimu di Cesaru.

Cù l'iniziu di l’annu 32 a.C., finì l’incaricu di i trè triumviri è diventonu consuli dui sustenidori di Antoniu, Gaiu Sosiu è Gneu Dumiziu Enobardu: u primu cundannò apertamente Ottavianu è lanciò una legislazione contru à ellu, mentre chì Dumiziu stete più in caretu; u nipote di Cesaru, per tutta risposta, ghjunsi armatu durante una seduta dopu di u Senatu è accusò i dui consuli, i quali, incù parechji senatori, scappetinu u lindumane da Roma è si unìssenu à Antoniu.

Antoniu s'era intantu cullucatu in Efesu incù Cleopatra è culà i dui stèvanu raccugliendu e so armate: a flotta sola cuntava ottu centu nave, di e quale duie cente facianu parte di a flotta di a reghjina egizziana. Malgradu quessa, Antoniu, incitatu da Dumiziu Enobardu è d'altri, dumandò à Cleopatra di vultà in Egittu, ma ella, aiutata da Publiu Canidiu Crassu, cunvinse l'amante à fà la firmà; a decisione di ùn rinuncià à l'aiutu di a reghjina in a battaglia chì s’avvicinava in Grecia purtò parechji generale di Antoniu, frà i quali Enobardu, Luciu Munaziu Plancu, Marcu Tiziu è Marcu Ghjuniu Silanu, à abbandunà lu.

Durante u veranu, Antoniu è Cleopatra si culluconu in Samu è in Ateni, induve a reghjina fù accolta cù benivulenza; in u stessu periodu, a reghjina cunvinse l’amante di mandà una dichjarazione ufficiale di divorziu à Ottavia. I dui ghjunghjitenu infine in Patrassu, induv'elli stabilitinu u so campu d'inguernu: Antoniu avia infatti l’intenzione di cullà l’Adriaticu per assedià à Ottavianu è a so flotta in Brindisi o in Tarantu, ma Cleopatra, preoccupata di tene à sicuru l'Egittu, u cunvinse d'ùn attaccà direttamente l’Italia è di stà in Grecia.

In Roma, intantu, Plancu cunsigliò à Ottavianu di impatrunì si di u testamentu di Antoniu, cunsirvatu da e Vestale; ancu s'ella era una viulazione di a leghje è di i custumi religiosi, u documentu fù strappatu da u Tempiu di Vesta è qualchì parte soia fubbe letta in publicu, per a prupaganda d’Ottavianu: si fece una attenzione particulari à a nomina di Ghjuliu Cesariu cum'è erede di Cesaru, à e donazione d'Alissandria è à u fattu chì Antoniu vulia esse interratu in Alissandria accantu à Cleopatra è chì quella cità duvia diventà a nova capitale di a Republica. Quessu fù dunque u casus belli chì permise à Ottavianu, diventatu di novu consulu in u 31 a.C., di fà dichjarà guerra à Cleopatra, micca à Antoniu; era infatti difficiule di mantene l'appruvazione pupulare s’ella principiava una nova guerra civile è l'argumentu legale contr'à a reghjina ùn era tantu quellu di i novi territorii acquistati à e spese di a Republica, ma piuttostu u fattu chì u regnu d’Egittu stava armendu un cittadinu privatu, postu chì u putere triumvirale d’Antoniu era compiu. In più, Ottavianu vulia cusì fà rientrà i debiti chì Tolemeu XII avia cuntrattatu cù Cesaru.

A battaglia d'Azziu (31 a.C.)

E forze di Antoniu è Cleopatra (100 000 omi è 800 nave) eranu più numerose chè quelle d'Ottavianu (80 000 omi è 200 nave), ma eranu ancu menu addestrate è e nave micca cumpletamente equipaghjate per a guerra. I dui avianu difatti l'appoghju di parechji altri rè è suvrani urientali; mancavanu però Erode di Ghjudea è Malcu I di Nabatea, impegnati in una lotta trà di elli. Intantu i dui avianu spustatu l'accampamentu à Azziu, per u veranu; da sta pusizione qualunque tentativu d’Ottavianu di cullà versu u sudu, versu l’Egittu, averia pussutu esse bluccatu facilmente. À u principiu, d'estate, Antoniu è Cleopatra fubbenu vinti in parechji scontri vicinu à Azziu è e defezione trà i so alleati cuntinuavanu: Quintu Delliu, cumpagnu d’Antoniu dapoi assai tempu, è i rè Aminta di Galazia è Deiotaru di Paflagunia passonu cù Ottavianu. À quellu puntu certi cunsiglietinu à Antoniu di lascià u mare è di circà u scontru armatu in l’internu di a Grecia, mentre Cleopatra vulia u cumbattimentu navale per tene a flotta nimica luntanu da u so regnu.

À a fine si decise per a battaglia navale è Antoniu fece brusgià tutte e nave egizziane fora di 60, armendu e più putente, per evità chì quelle chì ùn pudianu cumbatte per mancanza d’omi cadessinu in manu nemica; per quattru ghjorni i venti fubbenu sfavurevuli, ma u quintu ghjornu entritinu in u cumbattimentu. Fù cusì chì, u 2 di settembre di u 31 a.C., e forze navale d'Ottavianu, guidate da Marcu Vipsaniu Agrippa, affrontonu quelle d'Antoniu è Cleopatra in a battaglia di Azziu; durante u cumbattimentu Cleopatra cumandò e 60 nave egizziane da a so portabandera, l'Antonia, restendu in e file daretu à l'imbuccatura di u golfu d’Ambracia. Eppuru, a reghjina, chì a so primura maiò era di mantene e forze intatte per difende l'Egittu, urdinò à e nave sott’à u so cummandu di apre si un passaghju à mezu à a flotta rumana è si rifughjò versu u sudu, seguitata subitu da Antoniu, chì abbandunò i so suldati; a battaglia fù cusì vinta da Agrippa è i dui amanti fughjitinu versu u Capu Tenaru.

Ritornu in Egittu è assediu d'Alessandria (31-30 a.C.)

Cleopatra è Antoniu vultonu cusì in Egittu, mentri Ottavianu occupava Ateni, è sbarconu à Paraitoniu, cità purtuale à punente d'Alissandria; da quallà, a reghjina turnò in a capitale circhendu di fà passà l’azzione belliche in Grecia cum’è una vittoria, mentri Antoniu si cullucò in Cireni, induv'ellu sperava di riceve sustegnu militare da u guvernatore Luciu Pinarìu, à u quale ellu stessu avia assignatu a pruvincia. Quest'ultimu, però, dopu à avè ricevutu nutizie di a battaglia d’Azziu, s'affiancò à Ottavianu è fece tumbà i messageri d’Antoniu; què purtò Antoniu vicinu à u suicidiu, impeditu solu da i so ufficiali. In 'ssu statu Antoniu turnò in Alissandria è si misse in isulamentu vuluntariu, fendu si custruisce una piccula residenza nant’à l’isula di Faru, chjamendu la Timoeion in onore di Timone d'Ateni, filosofu cunnisciutu per cinismu è misantropia. Intantu, in capitale, Cleopatra avia probabilmente prublemi finanziarii è circò di rimedià ci cù una spugliazione di i tempii (eppuru 'ssi avvenimenti puderianu esse stati invintati da a prupaganda augustea); ùn hè ancu chjaru s'ella fece tumbà Atravaside II d’Armenia, per mandà u so capu à u rivale Artavasde I di Media Atropatene, circhenndu una allianza cun ellu. Difatti, l'Egittu si truvava sempre più marginalizatu, postu chì ancu Erodu, chì avia cunsigliatu à Antoniu d'abbandunà à Cleopatra, si era cullucatu in Rodi è quallà avia fattu una allianza cù Ottavianu.

Cleopatra cuminciò à alluntanà si da Antoniu è, à a fine di l'estate di l'annu 31 nanzu à Cristu, principiò i preparativi per lascià l'Egittu cù u figliolu Cesarione: u pianu era d'abbandunà u Mediterraneu è di cullà da u mare Rossu, per andà in un portu luntanu, probabilmente in India, induv'ella puderìa ripiglià e so forze. U prughjettu fù però resu impussibule da Malcu I di Nabatea, u quale, cunsigliatu da u guvernatore di a Siria Quintu Dìdiu, riescì à fà brusgià a flotta di Cleopatra di stanza in u mari Rossu, cum'è vindetta per l’aiutu egizzianu à Erodu, u so rivale; a reghjina fù dunque custretta à firmà in Egittu è à neguzià cù Ottavianu. Certi fonti affirmanu chì in 'ssu periodu Cleopatra principiò varii sperimenti cù i veleni nant’à prighjuneri è servitori, ancu s’ellu hè prubabile chì ancu ‘ssa voce fussi fruttu di a prupaganda d'Ottavianu.

À quellu tempu sia Cesarione sia Marcu Antoniu Antillu, figliolu d'Antoniu è Fulvia, entronu à fà parte di l'efebi, è u primu fù iniziatu à u guvernu parziale di l'Egittu, per pudè succede in modu efficace à a mamma. À quellu puntu Cleopatra è Antoniu mandonu, separatamente, messageri in Rodi da Ottavianu, u quale rispose probabilmente solu à a reghjina: 'ss'ultima dumandava chì i so figlioli ereditessinu u regnu è chì Antoniu fussi lasciatu campà quallà in esiliu è offre à u generali rumanu soldi è rigali in oru. A risposta ghjunsì à traversu l'inviatu Tirso, chì li cunsigliò di salvà si fendu tumbà à Antoniu: mentri Lepidu ùn riprisentava una minaccia ancu da vivu, Ottavianu ùn pudìa dì listessu per Antoniu, chì dunque avia da esse eliminatu; 'ss'ultimu, però, suspittendu una cuspirazione, fece frustà l'ambasciadore è u rimandò in daretu senza alcunu accordu.

Ottavianu pigliò cusì pussessu di a cità è di u palazzu reale, tenendu in e so mane Cleopatra è i so trè figlioli più chjuchi: Cesarione, in effetti, era statu fattu alluntanà da a mamma versu l'Altu Egittu, per scappà forsi in Etiopia o in Iranu, ma cunvintu di pudè vultà, fù anch'ellu missu sottu custodia. Quandu Cleopatra amparò da un certu Corneliu Dolabella chì Ottavianu avia l'intenzione di purtà la à Roma incù i so figlioli, è postu ch'ella ùn vulia esse messa in mostra in un trionfu, truvò infine u manera di pone fine à a so vita u 10 o u 12 d'aostu; e fonte chì ci sò ghjunte sò tutte d'accunsentu nantu à u fattu chì a manera di u suicidiu ùn hè micca cunnisciuta, ma tutte parlanu di l'usu di veleni è dicenu chì l'unicu segnu di viulenza truvatu nantu à u corpu fubbe dui picculi tafoni nantu à u bracciu: a reghjina si feci avvelenà forse da u morsu d'un aspide o d'un cobra egizzianu (’ssa versione hè diventata a più pupulare), o per mezu d'un acu o d’un puntarolu, o cun un unguentu d'un certu tipu.

Malgradu ch'è Ottavianu fussi firmatu assai cuntrariatu da a morte di a reghjina, cuncessi ch'ella fussi interrata cù ritu reale accantu à Antoniu. Dopu à qualchì ghjornu di a morte di Cleopatra, ancu Cesarione, u so figliolu maiò, truvò a morte per ordine d'Ottavianu, chì fù cunvintu in issu sensu da u filosofu Ariu Didimu; l'altri trè figlioli di a reghjina fubbenu invece cundutti in Roma per esse crisciuti cum'è citatini rumani. A cuncquista di l'Egittu da parte d'Ottavianu riprisentò l'ultimu cunflittu di l'età ellenistica, principiata cù a morte impruvisa di Lisandru Magnu in u 323 a.C., è a sparizione di Cleopatra ne hè generalmente cunsiderata a data finale. U guvernu di a nova pruvincia d'Egittu fù cunfidatu à Corneliu Gallu è i territorii tolemaichi chì firmavanu fubbenu annessi direttamente da Roma o cunfidati à suvrani clienti; e statue d'Antoniu fubbenu fatte distrughje, mentre quelle di Cleopatra fubbenu risparmiate, sia per ùn interferisce cù e quistione religiose egiziane sia postu chì un membru di a corte di a reghjina pagò à Ottavianu 2 000 talenti per assicurà si chì a mimoria di a suvrana firmessi intatta.

In u 29 a.C., quand'ellu celebrò u trionfu in Roma, Ottavianu feci espone durante a ceremonia un'imagine pittata di Cleopatra rapprisintata cù serpi, dendu cusì valore à a teoria secondu a quale a reghjina si tolse a vita per mezu di u morsu d'un rettile. A tomba d'Antoniu è Cleopatra ùn hè mai stata ritruvata, ma da l'anni 2000 si pensa ch'ella possi esse situata in u situ di Taposiris Magna, sottu à i tempii d'Iside è Osiride, in seguitu à scavi prumossi da l'avvucata è archeologa dilettante Kathleen Martinez è fatti da l'egittologu Zahi Hawass. Sicondu l’archeologhi, a camera sepulcrale si truvarebbe sottu à l'attuale livellu di u mare.