Waten

• War lez ar stêr Aa emañ Waten.

XI^vet kantved

• 1072: krouidigezh an abati Saints Nicolas et Riquier.

XX^vet kantved

• Milourion eus Waten marvet er brezelioù bed: 89 er Brezel-bed kentañ, 18 en eil hini.
• Eil brezel-bed:
• 3 a viz Gwenholon 1939 - 23 a viz Mae 1940: soudarded an tirlu gall diazezet e Waten, hag un unvez ijin-brezel eus lu ar Rouantelezh-Unanet a zeu ivez.
• miz Mae 1940, Emgann Waten: gant ar soudarded eus ar Rouantelezh-Unanet eo distrujet ar pont doubl dreist d'an Aa d'ar 24. Kregiñ a ra an emgannoù etre ar C'hallaoued hag an Alamaned evit daleañ ar re-mañ ha gounit amzer evit ma c'hellfe ar soudarded eus Breizh-Veur hag eus Bro-C'hall kelc'hiet gant an armeoù alaman achap dre Zukark. An difennourion ziwezhañ a voe tapet da brizonidi-vrezel gant an Alamaned d'ar 26 tro 6 eur beure er Sal Sant-Jili.
• Bombezadegoù: bombezet e voe Waten gant ar Re Gevredet e miz Here 1941 hag e miz Eost 1943. E 1944 e voe graet bombezadegoù stank e mizioù C'hwevrer, Meurzh, Ebrel, Mae hag Even 1944 gant ar Re Gevredet abalamour d'an diazlec'h bannañ fuc'helloù V1 a oa bet savet e Koad Waten d'an Alamaned; d'ar 6 a viz Ebrel, 12 B-24 eus Eighth Air Force eus United States Army Air Forces, gwarezet gant 27 P-47, a dizh o falioù er gumun. 36 den nann-soudard a voe lazhet gant ar bombezadegoù er gumun; siviled all eus Waten a varvas abalamour d'ar brezel: daou e ti-gar Hazebroek gant ur vombezadeg, pevar gant tarzhadennoù e mirlec'hioù tennoù, daou all e Servij al Labour Ret en Alamagn ha div vageerez e bourzh an Henriette.
• 6 a viz Gwenholon 1944: dieubet eo Waten gant al lu kanadian.

Bez ar C'hommonwealth e bered ar gumun

Ur milour eus ar Rouantelezh-Unanet a zo douaret e bered ar gumun. Marvet eo e miz Here 1917, e-pad ar Brezel-bed kentañ.