SEAT 600

C'hoarvezet ez eus gant ar SEAT 600 er bloavezhioù 1950 e Spagn ar pezh a oa c'hoarvezet en Alamagn er bloavezhioù 1930 gant ar Volkswagen Käfer: gant ur renad diktatour e voe divizet e fardañ. An Instituto Nacional de Industria, anezhañ un aozadur stadel, eo a grouas an embregerezh SEAT e 1950.

Un nebeud skouerennoù eus ar FIAT 600 a voe enporzhiet, hag e miz Mae 1957 e krogas an embregerezh SEAT da fardañ an hevelep karr dindan aotre ar FIAT; ur gevrat FIAT-SEAT a oa bet c'hoazh evit fardañ ar Fiat 1400 e Spagn (1953-1964).
Evit ar renkad sokial etre, na c'helle ket prenañ kirri cheuc'hoc'h, e oa ar SEAT 600: etre 65 000 ha 73 500 Pesetas e oa ar priz, da lavarout eo etre 19 000 € ha 21 500 €.

D'ar 27 a viz Mezheven 1957 e teuas ar SEAT 600 kentañ er-maez eus al labouradeg e Barcelona. Meur a zoare 600 a vo goude-se, anvet "600", "600 D", "600 E" ha "600 L Especial", hep kemer e kont ar c'harroñsadurioù kenwerzhel (stroborelligoù) ha to-disto.

Gant ar c'harroñser katalan Costa e voe hiraet an etreahel, 2 076 mm e-lec'h 2 046 mm, evit ober ur 600 peder zor e-lec'h div; ar SEAT 800 e voe anv ar stumm nevez-se. Berzh mat a-walc'h a reas ar "800", a oa un deveradenn spagnol eus ar raktres italian orin.

Tamm-ha-tamm e c'hoarvezas un digresk e gwerzhioù ar SEAT 600 en abeg da gevezerezh kirri all a oa dedennusoc'h evit ar brenerien, evel ar Renault 5 adalek 1972 hag ur SEAT all, ar 127, a zeuas war ar marc'had er memes bloaz da geveziñ ouzh an R5.

Un abeg all a voe: strizh ha bresk e oa postoù kreiz karroñserezh ar 600, ar pezh a rae diaes staliañ ar gourizoù-surentez, a voe ret e Spagn adalek 1985.

Daoust da veur a gemmadenn er Bouton-kof e teuas ar skouerenn niverenn 799 419 ha diwezhañ er-maez eus ar chadenn fardañ d'an 3 a viz Eost 1973, warni ur skritell bet lakaet gant micherourien al labouradeg: « Naciste príncipe y mueres rey » ("Priñs e oas ganet, roue a varvez"). Un 10 000 bennak a oa c'hoazh war an hentoù e 2007.

« SEAT 600 » hepmuiken e voe doare kentañ ar c'harr (1957), petra bennak ma 'z eo anavezet dre an anv "600 N" (Normal) evit e ziforc'hañ diouzh an doareoù all a voe kenderc'het diwezhatoc'h. A-us ar rodoù dirak, a bep tu da c'holo ar c'houfr, e oa ar blinkerioù; adalek ar 600 D (1963) e voent lakaet dirak ar rodoù. War-zu an tu a-dreñv e tigore an dorioù dirak – en doare "emlazh" neuze evel ma lavarer, ar mudurunoù o vezañ a-drek e-lec'h dirak – betek ar stumm 600 E (1969).

SEAT 600 "N"

SEAT 600 D (1963–1970)

"4T.DA" e oa anv ofisiel ar 600 D.

SEAT 600 E (1969–1973)

Heñvel eo dezverkoù teknikel ar 600 E ouzh re doare diwezhañ ar 600 D. Traoùigoù zo bet kemmet en diabarzh; brasoc'h eo ar gouleier dirak hag a-dreñv. Un diforc'h bras eo an dorioù, pa n'int mui en doare "emlazh".

SEAT 600 L (1972–1973)

Kozh

E 1955, pa voe diskouezet ar SEAT 600 kentañ e Geneva, ne soñje ket d'an aozer herrgirri aostrian-italian Carlo Abarth (1908-1979) e troje ar "boulig"-hont d'ar c'harr pouezusañ en Istor e embregerezh.
Betek 1971 ec'h implijas ar c'harr-se evit diorren nevezentioù en aozañ karbedoù evit ar redadegoù.
Evit gwellaat ar SAET 600, a oa bet lesanvet venenoso (""pistrius") e lakaas sevel ul labouradeg nevez e Torino evit kenderc'hañ kirri klok ha kitoù dafar a-viliadoù evit aozañ ar 600 "N" da vont d'ar c'hevezadegoù.

Aozerien all e Spagn a aoze ivez kirri SEAT 600 evit kevezata: an tiegezh Juncosa e Barcelona eo an hini brudetañ, e-kichen Franco Conti, Nardi, Autotécnica ha Speewell.

Nevez

Meur a aozer o deus troet ar SEAT 600 da garr tredan: ur skouer eo al Little e601.

Er bloavezhioù 2020, an aozer Juan Trino Racing e Tíjola a grogas da labourat diwar skouerennoù kozh eus ar 600. Ar c'harroñsadur hepken a viras; e-lec'h ar c'hastell orin e stalias ur framm liestuellennek, hag ur c'heflusker marc'h-tan Suzuki GSW-1300R Hayabusa a erlec'hias ouzh ar c'hozh 633 cm³. « S-600 JTR » eo anv an disoc'h, "al loenekañ SEAT 600 a zo er bed" (el SEAT 600 más bestia que existe). Ha gwir eo ez eo troet ar Bouton-kof d'ul loen gouez: betek 205 marc'h-nerzh, ha 0-100 km/h e 4 eilenn.

Meur a stumm a voe d'ar SEAT 600 e Spagn.

• 600 Comercial: evit ar c'henwerzh, hep gwerennoù a-dreñv hag ouzh ar c'hostezioù, hag hep kadorioù a-dreñv; marc'hatmatoc'h eget ar 600 "N".
• 600 Descapotable: un doenn lien, to-disto, un tamm mat keroc'h eget ar 600 "N".
• 600 Formichetta: ur storobellig fardet gant an embregerezh Siata Española e Barcelona adalek 1960; war-dro 7 000 karr a voe kenderc'het.
• 600 Múltiple: un deveradenn eus ar Fiat Multipla, 6 plas ennañ, ar monospas kentañ neuze.
• 600 Playera: ur 600 arbennik evit letioù an traezhennoù, evit keveziñ ouzh ar Citroën Mehari.
• 600 Savio: ur skouerenn zo hepken, deveret diouzh ar Múltiple ha kemmet evit degemer an diktatour Franco e 1964.
• 800: ur 600 peder zor dezhañ, fardet gant ar c'harroñser Costa ha gwerzhet e Spagn hepken.

Bez' e oa ivez doareoù SEAT 600 kemmet ha fardet gant aozerien evel Serra, Siata Española hag all. Gant Siata e-unan e voe meur a zoare SEAT 600, evel an Ampurias hag an Tarraco a-douez reoù all.

• Rany 600: un doare buggy aozet adalek 1970 betek 1985.
• SEAT 600 Caba: ur 600 to-disto aozet gant ar c'harroñser Caba e Barcelona.
• SEAT 600 Credos Sport: treset ha fardet gant Carrozauto e Calahorra.
• SEAT 600 Gabor: treset ha fardet gant Galobart, e Barcelona.
• SEAT 600 Inauto: 600 berlinenn doare koupe graet diwar ur 600 hiraet ha to-disto a voe kenderc'het gant Inauto e Cádiz.
• SEAT 600 Milton Tipo Roadster Spider: treset gant ar vreudeur Antonio ha Pedro Mata e 1968; 35 skouerenn hepken a voe kenderc'het.
• SEAT 600 Rai: karroñsadur adtreset gant un treser spagnol; un nebeud skouerennoù hepken a voe fardet, lusket gant keflusker 843 cm³ ar SEAT 850.
• SEAT 600 Real: ur skouerenn hepken, urzhiadet gant ar roue Juan Carlos Iañ evit e vab Felipe; hiraet eo bet tu dirak ur SEAT 600 to-disto.
• SEAT 600 Serra: ar c'harroñser Serra e Bracelona a fardas gant Corver, e Barcelona ivez, meur a zoare SEAT 600 (koupe, roadster, to-disto).
• 750 Nardi: adkarroñset gant ar farder italian Enrico Nardi e Torino, ha lusket gant ur c'heflusker 750 cm³; nebeut-tre a skouerennoù a voe kenderc'het.
• 750 Primavera: fardet e 1961 gant Bagovia e Cornellá de Llobregat (Proviñs Barcelona) diwar ur SEAT 600 hiraet ha to-disto.

• 750 Sport: e 1957 e voe diskouezet e Saloñs Barcelona ar Seat 750 Sport, treset gant ar c'harroñser italian Allemagno e Torino diwar kastell ar SEAT 600 "N" ha lusket gant ur 750 cm³ / 40 marc'h-nerzh.

E Spagn e vez lakaet ar SEAT 600 d'ar c'harbed a lakaas ur c'heflusker e korf ar vro. Monumantoù zo bet savet dezhañ zoken.

E 2008 e voe dioueliet ar c'hentañ monumant d'ar SEAT 600, e Fuengirola (Proviñs Málaga).
Un eil monumant a voe e 2011, daou 600 ennañ (unan melen hag unan glas), e Churriana de La Vega (Proviñs Granada).
E 2015 e voe un trede monumant, e Martos. Er memes bloaz e voe staliet unan ivez e Cartagena.
D'an 9 a viz Gwengolo 2017, evit lidañ 60vet deiz-ha-bloaz ar Seisciento, e voe bodet 812 SEAT 600 da zibunañ war ar Circuito de Montmeló e Barcelona. Ne voe degemeret nemet 787 karr gant ar Guinness World Records.

• (es) José Feliú: SEAT 600, Madrid, Tikal-Susaeta, 2007 (ISBN 9788430560721).
• (es) María José Torrejón, Un guiño a la historia sobre cuatro ruedas, Hoy, 18/06/2007