TikTok wan sasamaannya dalam bahasa Mandarin; Douyin adalah layanan hosting pidio durasi handap, ampunnya perusahaan Tiongkok ByteDance. Layanan ngini mahosting pidio nang dikirim pamakai, durasinya bisa matan 3 detik sampai 10 menit. Wahini beberapa pamakai ada nang sudah kawa maunggah pidio durasnya sampai 60 menit.
Matan mancungul, Tiktok wan Douyin sudah dapat popularitas glubal. Pada Uktubur 2020, Tiktok sudah malabihi 2 miliar unduhan seluler di seluruh dunia. Morning Consult menggalari Tiktok sabagai merk nang tumbuh paling hancap ketiga tahun 2020, imbah Zoom wan Peacock. Cloudflare meandak TIkTok jadi situs nang paling populer di tahun 2021, melingkawi google.com.
Douyin
Douyin dilungsurkan matan Tiongkok pada bulan Septimbir 2016, panambaian ngarananya A.me, imbah tu beganti ngaran jadi Douyin pada bulan Disimbir 2016. Douyin diganalakan dalam 200 hari dan dalam waktu satu tahun bisi 100 juta pamakai, wan labih pada 1 milyar video nang ditonton saban harinya.
TikTok vs Douyin
Douyin dilungsurkan ke pasar Tiongkok pada bulan Siptimbir 2016. TikTok adalah persi luar negerinya Douyin nang tapisah, wan dilungsurkan pada tahun 2017 gasan iOS wan android gasan di sepalihan pasar luar Tiongkok. Tapi, TikTok tersedia di seluruh dunia imbah menggabung layanan media sosial Tiongkok lainnya, yaitu Musical.ly pada tanggal 2 Agustus 2018.
TikTok wan Douyin bisi tampilan muha nang sama tapi kada bisi akses ke konten satu wan lainnya. Server buhannya masing-masing bisi basis pasar sorangan tiap aplikasinya. 2 produk ngini mirip, tapi fiturnya kada identik. Douyin bisi fitur pencarian dalam pidio berdasarkan muha urang gasan melihat pidio tertentu, lawan ada fitur lain kayak betukar barang, mesan hotel, wan meulah ulasan beimbai lawan tag geograpis.
Kasus
Digugat Jaksa Agung Wan Hubnur
Jaksa Agung wan Hubnur sepakat menggugat TikTok. Gugatan hanyar gasan TikTok ngini disambat maraga sengaja maulah "klub tari batilanjang pirtual" nang melibatakan kanakan. Gugatan ngini diajuakan ulih Badan Perlindungan Kunsumen Negara Bagian Utah, Amirika Sarikat nang manuduh Tiktok sudah meambil untung dari fitur live wan mata duit pirtual nang mempasilitasi eksploitasi wan bedagang seksual, distribusi pornografi wan tindakan liegal nang lain.
Ujar Hubnur Utah, Spencer Cox, tuduhan fitur live ampun TikTok ngini kada hanya mengkhawatirkan tapi jua marasahkan. TikTok dianggap abai wan keselamatan kanakan, khususnya meambil untung dari hasil eksploitasinya, ini kada kawa ditolelir.
