Teluqu dili (తెలుగు) — teluqu xalqının dili və danışanların sayına görə dünyada ən böyük dravid dillərindən biridir. Hindistanın iyirmi iki rəsmi dilindən biri və Hindistan hökuməti tərəfindən ölkənin “klassik dilləri” kimi tanınan altı dildən biridir.
Teluqu dili Hindistanda ən çox yayılmış üçüncü dildir; 2011-ci ilə olan məlumata görə təxminən 96 milyon danışanı var. Bu dildə Hindistanın Andhra Pradeş və Telanqana ştatlarında danışılır və həmin ştatlarda rəsmi dil statusuna malikdir. Həmçinin teluqu xalqının əhəmiyyətli diasporasının yaşadığı ölkələrdə — Cənub-Şərqi Asiya ölkələrində, Afrikanın və Yaxın Şərqin bəzi dövlətlərində, Ficidə və Mavriki adalarında da yayılmışdır.
Xüsusiyyətlərinə və quruluşuna görə teluqu dili “ümumdravid standartına” yaxındır. Teluqunun yazı (ədəbi) və danışıq formaları fərqləndirilir; bu fərqlər təkcə leksikaya deyil, həm də qrammatikaya aiddir.
