Wikidata ye una wiki de la Fundación Wikimedia que sirve como base de datos col envís d'apurrir una fonte común pa ciertos tipos de datos, como feches de nacencia, usaos pa los proyeutos Wikimedia como Wikipedia. Esto ye asemeyao a la forma en que Wikimedia Commons apurre almacenamientu pa los ficheros de multimedia y accesu a esos ficheros pa tolos proyeutos de Wikimedia.
Historia del desendolcu
Wikidata llanzóse'l 30 d'ochobre de 2012 y foi'l primer proyeutu nuevu de la Fundación Wikimedia dende l'añu 2006.
La creación del proyeutu financióse con donaciones del Institutu Allen pa la Intelixencia Artificial, la Fundación Gordon y Betty Moore y Google Inc., sumando en total 1,3 millones d'euros. El desendolcu inicial del proyeutu ta siendo supervisáu por Wikimedia Deutschland, y estremóse en trés fases:
- Centralizar los enllaces interllingüísticos – enllaces ente artículos sobro'l mesmu asuntu en distintos idiomes.
- Apurrir un llugar central pa la información de les Fiches de toles Wikipedies.
- Crear y actualizar llistes d'artículos basaos en datos de Wikidata.
La primer fase tuvo llugar el 30 d'ochobre de 2012. Esto permitió que se crearen elementos que pudieran rellenase con información básica; una etiqueta (un nome o títulu), un alcuñu (un nome alternativu a la etiqueta), una descripción y enllaces interllingüísticos p'artículos de Wikipedia. Cada elementu tien un identificador únicu precedíu de la lletra Q, por casu Q7163 ye l'elementu pa política. Esto permite que la etiqueta, l'alcuñu, y la descripción, puedan traducise ensin favorecer a nengún idioma en particular.
El 14 de xineru de 2013, la Wikipedia n'húngaru foi la primera Wikipedia n'utilizar los enllaces interllingüísticos de Wikidata. Esta carauterística estendióse dempués a la versión hebrea ya italiana el 30 de xineru y a la versión inglesa el 11 de febreru. El cambéu afeuta al restu de Wikipedies dende'l día 6 de marzu de 2013.
Los primeros aspeutos de la segunda fase punxéronse'n marcha'l 4 de febreru de 2013, introduciendo pares de claves y valores pa entraes de Wikipedia. Pel momentu los valores tán llindaos a tres tipos de datos: elementos, cadenes de testu ya imáxenes de Wikimedia Commons. Nel futuru va haber más tipos de datos como coordenaes y feches.
El 27 de marzu de 2013, la segunda fase empezó a funcionar en 11 Wikipedies, depués el 22 d'abril incluyóse la Wikipedia n'inglés y el 24 d'abril de 2013, estendióse a les demás Wikipedies, pudiendo asina incluyir datos dende Wikidata.
Ver tamién
- DBpedia
- Freebase
- Web semántica
- Gordon E. Moore
