Phoenix ye la capital del estáu d'Arizona, nos Estaos Xuníos, y tamién la del condáu de Maricopa. Ye, colos sos 1.552.259 habitantes, (U.S. Census Bureau, 2007), la ciudá más poblada del estáu. El so área metropolitana, la quinta más grande de los Estaos Xuníos (y la segunda de tola zona occidental dempués de Los Angeles), ye llamada El valle del sol (The Valley of the Sun), abarca los condaos de Maricopa y Pinal y tien una población de 4.179.427 persones.
Fundada en 1868 nel valle del ríu Salt, na zona central d'Arizona, convirtióse alministrativamente nuna ciudá en 1881, y ye capital del territoriu dende 1889. La so economía, centrada nel sector agrícola (especialmente nos cítricos y nel algodón) lleva más de venti años diversificándose. Del so puxu da idea'l fechu de que l'área metropolitana ye la segunda de mayor crecimientu de población de tol país. La xente que se mudó ellí trabaya, en dellos casos, nes instituciones alministratives estatales o na universidá (Arizona State University), la mayor, colos sos 67.000 alumnos, d'ente toles de titularidá pública del país. Pero tamién ye potente l'actividá turística, que saca bon provechu del bon clima (temperatures de más de 30º de media más de 100 díes al añu), y hai cerca d'ella una base aérea militar, la de Luke, na que trabayen 7.500 persones. El sector más importante, nostante, ye'l de les empreses d'alta teunoloxía y telecomunicaciones. Delles compañíes perimportantes nel Internet (eBay, Google, AOL...) tienen la so sede na ciudá, que acueye tamién les oficines principales de delles de les compañíes más importantes de los Estaos Xuníos (Avnet, Apollo Group, US Airways, la división aerospacial de Honeywell), el centru de transaiciones financieres y d'atención al cliente d'American Express y trés fábriques de chips de la compañía Intel.
Enllaces esternos
- Páxina web oficial de la ciudá Archiváu 2011-02-25 en Wayback Machine (n'inglés)
- Wikimedia Commons acueye conteníu multimedia sobre Phoenix, Arizona.
