Mintaka

Mintaka (Delta Orionis / δ Ori / 34 Orionis) ye una estrella na constelación d'Orión que'l so nome deriva de la pallabra árabe pa cinturón, منطقة manţaqah. Xunto a Alnitak (ζ Orionis) y Alnilam (ε Orionis), forma parte del llamáu Cinturón d'Orión, y con elles forma'l grupu conocíu como «Les trés Maríes».

En realidá Mintaka ye una estrella múltiple complexa; a un minutu d'arcu de la estrella principal puede reparase otra estrella de magnitú aparente +6,8. A la distancia de 915 años lluz a la que s'atopa Mintaka, la separtación real ente dambes ye de siquier 0,25 años lluz. Ente estos dos componentes esiste una tenue estrella de magnitú 14. La estrella de magnitú 6,8 ye amás una binaria espectroscópica.

La componente principal —que llamamos Mintaka— tien magnitú +2,23 y ye tamién una estrella binaria, que la so duplicidá afayóse tamién per aciu espectroscopia. Ta compuesta por una estrella azul de tipu espectral O9.5II y una estrella clasificada como B0III o B2V. Caúna d'elles ye 90.000 vegaes más lluminosa que'l Sol, siendo estrelles bien masives, con una masa de 20 mases solares caúna. El periodu orbital del par ye de 5,73 díes, clisándose llixeramente la una a la otra, lo que trai una cayida nel rellumu de 0,2 magnitúes.

En 1904 Johannes Franz Hartmann, usando la lluz proviniente de Mintaka, afayó que l'espaciu interestelar de la galaxa nun ta vacíu y contién gas y polvu.