Madonna

Nació en Bay City, Michigan el 16 d'agostu de 1958. La so madre, Madonna Louise Fortin, yera d'ascendencia francocanadiana, y el so padre, Silvio Anthony Ciccone, ye italo-americanu. Pasó los sos primeros años en Bay City y en 1977 camudóse a Nueva York, pa siguir una carrera na danza contemporánea. Dempués de participar en dos grupos musicales (Breakfast Club y Emmy). Llanzó'l so discu debú: Madonna en 1983, siguío d'una serie d'álbumes nos qu'atopó una inmensa popularidá, superando les llendes de conteníu de les lletres de los sos cantares y esplotando les imáxenes nes sos videos musicales, qu'a lo llargo de la so carrera convirtiéronse en pieces d'arte.

Munches de los sos cantares algamaron el númberu unu nes llistes musicales de dellos países alredor del mundu; los sos mayores ésitos inclúin temes como «Holiday», «Like a Virgin», «Into the Groove», «Material Girl», «True Blue», «Papa Don't Preach», «La Isla Bonita», «Like a Prayer», «Express Yourself», «Vogue», «Frozen», «Ray of Light», «Music», «Hung Up» y «4 Minutes». Madonna foi emponderada polos críticos poles sos producciones musicales y puestes n'escena.

La so carrera viose reforzada poles sos apaiciones en diverses películes poles que recibió comentarios mistos. El so rol más emponderáu ye'l d'Eva Perón, pa la película de 1996, "Evita", pol qu'inclusive ganó un Globu d'Oru; pero recibió crítiques dures por otros papeles. Otres ocupaciones de Madonna inclúin ser diseñadora de moda, escritora de llibros infantiles, direutora de cine y productora musical, amás de que ye dueña del sellu discográficu Maverick. Tamién ye una aclamada empresaria, y en 2007, robló un contratu de 120 millones de dólares cola productora Live Nation.

Madonna vendió ente 300 y 500 millones de discos, colo qu'establez el récor mundial de «la solista más esitosa y de mayores ventes musicales de tolos tiempos», incluyíu nel "Llibru Guinness de los récores". Según la Recording Industry Association of America (RIAA), ye la solista con mayores ventes del sieglu XX, y la segunda con mayores ventes nos Estaos Xuníos (detrás de Barbra Streisand), con 64 millones d'álbumes certificaos. Nel Reinu Xuníu ye la solista femenina con mayores ventes de cenciellos na historia, con 17,6 millones.

En 2008, la revista Billboard clasificó a Madonna nel númberu dos, detrás de The Beatles, nel "Billboard Hot 100 All-Time Top Artists", convirtiéndola na solista más esitosa na historia musical, amás de ser incluyida nel "Salón de la Fama del Rock" nel mesmu añu. Madonna casóse en 1985 col actor Sean Penn, dixebrándose en 1989, pa volver casase con Guy Ritchie nel añu 2000, dixebrándose en 2008. Tien una fía, Lourdes, nacida en 1996, frutu de la so rellación col so entrenador personal de fitness, Carlos Leon.

Ye considerada de manera xeneral por diversos biógrafos, escritores, periodistes y demás medios de comunicación, como la muyer más influyente y esitosa de la historia musical. Madonna ye conocida por reinventar de cutio tantu la so música ya imaxe, a les qu'amestó ciertos detalles polémicos y sexualmente tresgresores a lo llargo de les décades. Amás ye reconocida como una fonte d'inspiración por dellos artistes y pol so gran legáu a la cultura pop.

Discografía

• Madonna (1983)
• Like a Virgin (1984)
• True Blue (1986)
• Like a Prayer (1989)
• Erotica (1992)
• Bedtime Stories (1994)
• Ray of Light (1998)
• Music (2000)
• American Life (2003)
• Confessions on a Dance Floor (2005)
• Hard Candy (2008)
• MDNA (2012)
• Rebel Heart (2015)
• Madame X (2019)
• Confessions II (2026)

Llibros

• Sex (1992)
• Les roses ingleses (The English Roses, 2003)
• Mr. Peabody's Apples (2003)
• Yakov and the Seven Thieves (2004)
• The Adventures of Abdi (2004)
• Lotsa de Casha (2005)

• Esta obra remanez de la traducción de Madonna de Wikipedia - castellanu, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.

• Wikimedia Commons acueye conteníu multimedia sobre Madonna.

• Madonna na Internet Movie Database (n'inglés)