Macáu (en chinu: 澳門, en portugués Macau) ye una de les dos rexones alministratives especiales de la República Popular China. Asitíase na costa meridional de China, na fastera occidental del delta del ríu Perla. Al este, na otra oriella del delta, ta Ḥong Kong, y arrodiándola pel norte ta la provincia de Guangdong. La economía del territoriu ta fondamente venceyada al turismu y al xuegu (prohibíu nel territoriu chinu), pero tamién hai actividaes industriales.
Historia
Antigua colonia portuguesa, foi alministrada por Portugal dende mediaos del sieglu XVI hasta 1999, lo que fizo d'ella, nos dos últimos años de control portugués, la cabera colonia europea en China. Los comerciantes portugueses asentáronse en Macáu na década de 1550. En 1557 el territoriu foi arrendáu a los portugueses pol emperador chinu como puestu comercial. L'alministración portuguesa d'una ciudá que siguía tando sometida a l'autoridá y la soberanía china caltúvose hasta 1887, cuando pasó a ser una colonia del Imperiu portugués. Esti país devolvió-y la soberanía a china el 20 d'avientu de 1999. Nel alcuerdu de devolución incluyíase una llei fundamental del territoriu, la Llei Básica de Macau, que llexisla les condiciones poles que'l territoriu caltendrá un altu gráu d'autonomia a lo menos hasta 2049.
Embaxo'l principiu "un país, dos sistemes", el gobiernu central de la República Popular ye responsable de la defensa y les rellaciones esteriores del territoriu, que caltién el so propiu sistema llegal, sistema monetariu, aduanes, política migratoria y una fuerza policial propia. El territoriu participa en munches organizaciones internacionales que nun obliguen, pa ser miembru, a que los territorios tengan soberanía nacional.
Llocalidaes hermaniaes
Les ciudaes hermaniaes con Macáu son:
- Rio de Janeiro ( Brasil)
- Luanda ( Angola)
- Chieti ( Italia)
- Recife ( Brasil)
- Faro ( Portugal)
- Maputu ( Mozambique)
- Lisboa (dende 1982) ( Portugal)
- Bruxeles (dende 1991) ( Bélxica)
- Porto (dende 1997) ( Portugal)
- Linköpings (dende 1997) ( Suecia)
- Coímbra (dende 1998) ( Portugal)
- São Paulo (dende 2000) ( Brasil)
- Đà Nẵng (dende 2006) ( Vietnam)
- Praia (dende 2007) ( Cabu Verde)
Enllaces esternos
- Wikimedia Commons acueye conteníu multimedia sobre Macáu.
Sitiu web oficial (en chinu tradicional)- Sitiu web oficial (n'inglés)
- Sitiu web oficial (en portugués)
- Sitiu web oficial (en chinu simplificáu)
- Macáu n'OpenStreetMap.
- Macáu n'OpenWeatherMap
