Delta Bootis (δ Boo / 49 Bootis / HD 135722) ye una estrella na constelación de Boötes de magnitú aparente +3,46. Ensin nome propiu habitual, dacuando ye conocida como Princeps, «príncipe» o «principal» en llatín. Alcuéntrase a 117 años lluz de distancia del Sistema Solar.
Delta Bootis ye una xigante mariella de tipu espectral G8III y 4990 K de temperatura, con una lluminosidá 59 vegaes mayor que la del Sol. El valor del so diámetru, llográu a partir de la midida del so diámetru angular, ye 10,4 vegaes mayor que'l del Sol. La so metalicidá ye baxa comparada a la solar, en redol al 40% de la mesma; como resultáu d'ello, pol so espectru ta clasificada como una estrella con llinies débiles de CN (cianóxenu).
Delta Bootis tien una compañera estelar de magnitú +7,8, una nana de tipu espectral G0 similar al Sol. Sicasí, la so baxa lluminosidá —un 80% de la solar— y el so pequeñu tamañu en rellación a la so temperatura de 5900 K —el so radiu equival al 87% del radiu solar—, suxeren que pue ser una estrella subenana; ello concuerda cola baxa metalicidá reparada en Delta Bootis A. Visualmente tán dixebraes cuasi 2 minutos d'arcu, lo qu'equival a una separación real de siquier a 3800 UA y un periodu orbital de más de 120.000 años.
