Carlos Alberto Arroyo Bermúdez (30 de xunetu de 1979, Fajardo (en) ) ye un ex-xugador de baloncestu puertorricanu que xugaba na posición de base. Llevó a cabu bona parte de la carrera profesional na NBA, onde disputó 569 partíos con siete equipos, y tamién compitió n'España, Israel y Turquía. Foi internacional cola seleición de Puertu Ricu, cola que participó nos Xuegos Olímpicos d'Atenes 2004 y en diverses competiciones internacionales de la FIBA.
Carrera deportiva
Arroyo desenvolvió la so carrera universitaria cola Florida International University (FIU), onde destacó ente 1998 y 2001. Acabó la so etapa universitaria como'l segundu xugador de la historia de FIU en superar los 1.600 puntos y estableció entós los récores de la universidá n'asistencies y robos de balón.
Nun foi escoyíu nel Draft de la NBA de 2001, pero esi mesmu añu incorporóse a los Toronto Raptors, convirtiéndose nel quintu xugador puertorricanu en participar na NBA. Los Raptors prescindieron d'él en xineru de 2002 y Arroyo treslladóse temporalmente a España, onde disputó cuatro partíos col Tau Cerámica de la Lliga ACB. En marzu de 2002 volvió a la NBA colos Denver Nuggets, que lu dexaron llibre n'agostu d'esi añu.
Poco depués fichó polos Utah Jazz. Na so primer temporada foi suplente principalmente de John Stockton, pero tres la retirada d'esti en 2003 convirtióse nel base titular del equipu. Na temporada 2003-04 disputó 71 partíos, toos como titular, con medies de 12,6 puntos y 5 asistencies por alcuentru.
Nos Xuegos Olímpicos d'Atenes 2004, Arroyo foi una de les principales figures de Puertu Ricu y lideró a la seleición na victoria por 92-73 escontra Estaos Xuníos nel primer partíu de la fase de grupos, una de les victories más destacaes de la historia del baloncestu puertorricanu.
Na temporada 2004-05 perdió protagonismu n'Utah y, dempués de dellos desacuerdos col entrenador Jerry Sloan, trespasáronlu'l 21 de xineru de 2005 a los Detroit Pistons a cambiu d'Elden Campbell y una futura eleición de primera ronda del draft. Colos Pistons llegó a les Finales de la NBA de 2005, nes que Detroit perdió por 4-3 escontra los San Antonio Spurs.
El 15 de febreru de 2006, Detroit trespasó a Arroyo y Darko Miličić a los Orlando Magic a cambiu de Kelvin Cato y una futura eleición de primer ronda del draft. Permaneció n'Orlando hasta 2008.
N'agostu de 2008 dexó la NBA pa fichar pol Maccabi Tel Aviv israelín. Na temporada 2008-09 ganó la lliga israelina y foi una de les figures del equipu na final, na que consiguió 22 puntos.
En 2009 volvió a la NBA al roblar colos Miami Heat. Xugó en Miami hasta marzu de 2011, cuando fichó polos Boston Celtics, que fueron el so últimu equipu na NBA.
N'avientu de 2011 incorporóse al Beşiktaş turcu. Na temporada 2011-12 formó parte d'ún de los equipos más esitosos de la historia del club, que conquistó la Copa de Turquía, la FIBA EuroChallenge y la lliga turca. Arroyo foi titular na final de la EuroChallenge y tuvo un papel destacáu nel títulu de lliga.
En xineru de 2013 fichó pol Galatasaray, col que ganó esi mesmu añu la lliga turca. Arroyo foi capitán del equipu y ún de los sos principales xugadores; el Galatasaray anovó'l so contratu dempués de ganar el campeonatu. Abandonó'l club en marzu de 2015 nel contestu de los problemes económicos y retrasos nos pagos de la entidá.
Depués d'un curtiu pasu prlos Cangrejeros de Santurce, el 23 de xunetu de 2015 anuncióse'l so fichaxe pol FC Barcelona pa la temporada 2015-16. Cola camiseta azulgrana disputó 33 partíos de la Lliga ACB y 22 de la Eurolliga.
Tres acabar la temporada en Barcelona dio por rematada la etapa nel baloncestu internacional de clubes y volvió pa Puertu Ricu. En 2017 reforzó a los Leones de Ponce na Liga de las Américas, competición na que promedió 16,4 puntos y foi'l máximu asistente con 8,5 asistencies per partíu. Tamién siguió compitiendo nel Baloncesto Superior Nacional de Puertu Ricu.
Retirada
En 2019 anunció la so retirada del Baloncesto Superior Nacional, poniendo fin a la so carrera como xugador profesional. Tres la retirada siguió venceyáu al baloncestu puertorricanu en funciones direutives y de collaboración cola seleición nacional.
Estadístiques NBA
| Lleenda | |||||||
|---|---|---|---|---|---|---|---|
| PX | Partíos xugaos | PT | Partíos de titular | MPP | Minutos per partíu | ||
| %TC | Porcentaxe de tiros de campu | %3P | Porcentaxe de tiros de 3 | %TL | Porcentaxe de tiros llibres | ||
| RPP | Rebotes per partíu | APP | Asistencies per partíu | ROB | Robos de balón per partíu | ||
| TPP | Tapones per partíu | PPP | Puntos per partíu | Negrina | Máximu de la so carrera | ||
Lliga regular
| Añu | Equipu | PX | PT | MPP | %TC | %3P | %TL | RPP | APP | ROB | TPP | PPP |
|---|---|---|---|---|---|---|---|---|---|---|---|---|
| 2001–02 | Toronto | 17 | 0 | 5.6 | .448 | .000 | .667 | .7 | 1.2 | .3 | .0 | 1.8 |
| 2001–02 | Denver | 20 | 1 | 13.8 | .439 | .000 | .750 | 1.4 | 2.5 | .2 | .1 | 4.1 |
| 2002–03 | Utah | 44 | 0 | 6.5 | .459 | .429 | .818 | .6 | 1.2 | .3 | .0 | 2.8 |
| 2003–04 | Utah | 71 | 71 | 28.3 | .441 | .325 | .804 | 2.6 | 5.0 | .9 | .1 | 12.6 |
| 2004–05 | Utah | 30 | 16 | 24.7 | .401 | .389 | .841 | 1.5 | 5.1 | .7 | .1 | 8.2 |
| 2004–05 | Detroit | 40 | 0 | 17.7 | .376 | .083 | .767 | 1.5 | 3.2 | .6 | .0 | 5.4 |
| 2005–06 | Detroit | 50 | 0 | 12.0 | .363 | .333 | .724 | 1.4 | 3.1 | .4 | .1 | 3.2 |
| 2005–06 | Orlando | 27 | 0 | 22.0 | .502 | .357 | .810 | 2.2 | 2.9 | .7 | .0 | 10.8 |
| 2006–07 | Orlando | 72 | 5 | 18.1 | .425 | .275 | .795 | 1.9 | 2.8 | .5 | .0 | 7.7 |
| 2007–08 | Orlando | 62 | 20 | 20.5 | .451 | .345 | .853 | 1.8 | 3.5 | .4 | .0 | 6.9 |
| 2009–10 | Miami | 72 | 35 | 22.0 | .475 | .280 | .844 | 1.8 | 3.1 | .5 | .1 | 6.1 |
| 2010–11 | Miami | 49 | 42 | 20.2 | .458 | .438 | .800 | 1.6 | 2.0 | .5 | .0 | 5.6 |
| 2010–11 | Boston | 15 | 1 | 12.7 | .314 | .600 | .917 | 1.5 | 1.7 | .5 | .0 | 2.4 |
| Total | 569 | 191 | 18.7 | .438 | .338 | .806 | 1.7 | 3.1 | .5 | .1 | 6.6 |
Playoffs
| Añu | Equipu | PX | PT | MPP | %TC | %3P | %TL | RPP | APP | ROB | TPP | PPP |
|---|---|---|---|---|---|---|---|---|---|---|---|---|
| 2002–03 | Utah | 3 | 0 | 9.0 | .333 | .000 | .750 | .7 | 1.7 | .0 | .0 | 3.0 |
| 2004–05 | Detroit | 19 | 0 | 7.9 | .356 | .000 | .667 | .5 | 2.1 | .2 | .1 | 2.1 |
| 2006–07 | Orlando | 3 | 0 | 13.3 | .357 | .000 | 1.000 | 1.7 | 2.0 | .3 | .0 | 4.0 |
| 2007–08 | Orlando | 4 | 0 | 7.5 | .500 | .000 | 1.000 | .5 | 1.0 | .0 | .0 | 1.5 |
| 2009–10 | Miami | 5 | 5 | 23.0 | .462 | .000 | 1.000 | 1.8 | 2.2 | .6 | .0 | 5.2 |
| Total | 34 | 5 | 10.6 | .388 | .000 | .773 | .8 | 1.9 | .2 | .1 | 2.7 |
