Ben Stiller

El segundu fíu de los cómicos Jerry Stiller (xudíu) y Anne Meara (católica d'ascendencia irlandesa) nació y crióse en Nueva York. Los sos padres, de pequeñu, avezaben a llevalu a platós onde actuaben y seique por eso, amosóse interesáu pol cine bien ceo, faciendo películes en súper 8 cola so hermana y los sos amigos. A los 10 años (1975) debutó como actor en Kate McShane, la serie de la so madre.

Ingresó na Universidá de California (Los Angeles) a los 18 años (1983) pa estudiar cine, pero nueve meses más tarde dexólo y tornó a la so ciudá natal p'abrir camín nel mundu del cine. Pa tal envís empezó a presentase a castings, mientres buscaba un axente que lu representara. Consiguió un papel nuna reedición de The House of Blue Leaves ―de John Guare― en Broadway xunto a John Mahoney. Esta obra ganaría cuatro Tonys. «Stiller llávase poco, pero ye bien bona xente» foi lo que dixo Mahoney de Ben nun falsu documental satíricu.

El so trabayu como risible foi perbién recibíu y dexó-y realizar un curtiumetraxe de 10 minutos llamáu The Hustler of Money, una parodia de la película The Color of Money de Martin Scorsese, na que Stiller faía'l papel de Tom Cruise y Mahoney el de Paul Newman, pero en cuenta de xugar al billar xugaben a los bolos. El curtiu llamó l'atención y emitióse en Saturday Night Live (1987). Un añu más tarde participó n'unu de los capítulos de la 4ª temporada de la serie Miami vice. Dos años dempués ufiertáron-y un puestu de guionista nesi programa. Tamién tuvo un pequeñu papel na película L'imperiu del sol, de Steven Spielberg.

Stiller dirixó Reality Bites y The Cable Guy. Más tarde, dexó de llau les sos ambiciones de dirixir pa protagonizar Daqué pasa con Mary, que llanzó la carrera actoral de Stiller a la fama. Otru intentu como direutor foi en 2001 con Zoolander, que foi abondo bien recibida, lo qu'amosó que podía ser una estrella delantre y darrera la cámara.

Magar que Stiller ye más conocíu polos sos papeles en películes, apaeció en delles sitcoms, siendo la primera en 1997 en Friends nel episodiu 22 de la tercer temporada llamáu «El [capítulu] del gritón» nel que faía de Tommy, el noviu gritón de Rachel (Jennifer Aniston). Nos últimos años fixo cameos notables en series d'ésitu como Arrested Development ―onde interpretó a Tony Wonder, el magu guay―, Curb Your Enthusiasm y na sitcom inglesa Extras, onde Stiller apaecía como una versión opuesta.

En mayu de 2000 casóse con Christine Taylor, con quien empezó a salir mientres el rodaxe del capítulu piloto pa la FOX d'una serie que nunca s'emitiría que se llamaba Heat Vision and Jack. Amás, Christine tamién participó en películes con Ben Stiller como Zoolander y Dodgeball. El matrimoniu tien dos fíos: Ella Olivia (1 d'abril de 2002) y Quilin Dempsey (10 de xunetu de 2005).

Tola so familia, el so padre Jerry Stiller (1927), la so madre Anne Meara (1929-2015), la so hermana mayor Amy Stiller (1961) y la so esposa Christine Taylor (1971) tamién trabayaron nel mundu del cine.

N'abril de 2005, la promoción de 2005 de la Universidá de Princeton nomólu miembru honorariu en Senior Week.

Actor

• There's something about Mary (1998): 30 millones de dólares d'Estaos Xuníos.
• Zoolander (2001): 25 millones de dólares d'Estaos Xuníos

• Stiller apaez nel videoclip del cantar «All Star» del grupu Smash Mouth
• Stiller asonsaña frecuentemente a munchos de los sos personaxes públicos favoritos, incluyendo a Bono, Tom Cruise y Bruce Springsteen.
• Stiller apaez nel videu de Limp Bizkit del so cantar «Rollin»: nél da les llaves al so amigu Fred Durst (cantante del grupu) y diz-y «Nun me rayes l'auto». Amás, Fred Durst menta a Ben Stiller al empiezu del cantar «Livin' it up» del discu Chocolate Starfish And The HotDog Flavored Water, diciendo: «Livin’ in the fast lane, this is dedicated to you, Ben Stiller, you are my favorite motherfucker, I told you, didn’t I?». Tamién apaez na tema outro de Limp Bizkit del álbum Chocolate Starfish and the Hotdog Flavored Water onde fala un ratu y dempués rise.
• Stiller apaez nun capítulu de Friends, como un noviu de Rachel que tien problemes de roxura.
• Stiller apaez nel videu Tenacious D Tribute, nel qu'a cencielles crucia nel planu del supermercáu mientres el clímax del cantar.
• Stiller apaez nel videu de Jack Johnson Taylor nel qu'escuerre a un pollu.
• Stiller apaez nel videu de P. Diddy Bad Boy for Life como'l vecín de P. Diddy.
• Dempués de dellos inesplicables cambeos d'humor mientres el rodaxe de Zoolander almitió que «Nun soi un puntu col que seya fácil tratar. Llámase Trestornu bipolar. Tengo un ricu historial d'eso na mio familia». Nuna entrevista de 1999 en GQ y más tarde en 2001 en Hollywood.com, Stiller dixo que tenía un «trestornu bipolar». En dos entevistes de payares y avientu de 2006, Stiller declaró que los comentarios nestes dos entevistes sobre'l desorde bipolar foren falsos. Nuna entrevista dixo: «En GQ dixi una chancia alrodiu de que taba como llocu y ellos espublizaron: “¡Ben Stiller ye bipolar!”».
• Stiller sofita al partíu demócrata y donó dineru pa John Kerry nes eleiciones presidenciales de 2004.
• Stiller y la so esposa apaecen ente'l públicu na película del conciertu de los Beastie Boys Awesome: I Fuckin’ Shot That!.
• Stiller apaez en King of Queens como'l padre de Arthur (interpretáu por Jerry Stiller) nun flashback.
• Hasta la fecha Stiller fixo 12 películes con Owen Wilson (de quien declaró en delles entrevistes que ye un gran amigu):
  • The Cable Guy (1996).
  • Permanent Midnight (1998).
  • Heat Vision and Jack (1999, televisión).
  • Meet the Parents (2000).
  • Zoolander (2001).
  • The Royal Tenenbaums (2001).
  • Starsky & Hutch (2004).
  • Meet the Fockers (2004).
  • Night at the Museum (2006).
  • Night at the Museum: Battle of the Smithsonian (2009).
  • Little Fockers (2010).
  • Night at the Museum: Secret of the Tomb (2014).
• Stiller apaez nel videoclip Closer de Travis como encargáu del supermercáu.
• El padre d'Eddie Cantrow en Matrimoniu compulsivu ye interpretáu por Jerry Stiller (el padre na vida real de Ben Stiller).
• Stiller apaez nel capítulu 17 de la serie Freaks And Geeks, tituláu The Little Things.
• En 2012, Stiller allegó como espectador a un partíu de tenis ente Andy Roddick y Roger Federer. Mientres un descansu, Roddick aprovechó pa dir hasta onde s'atopaba l'actor sentáu, mirando'l partíu, y pidió-y un autógrafu. Stiller, quien taba acompañáu pola so esposa, Christine, robló-y gustosu l'autógrafu al tenista norteamericanu.

• Wikimedia Commons acueye conteníu multimedia sobre Ben Stiller.
• Decine21.com (biografía de Ben Stiller).