Alice Brady (2 de payares de 1892, Nueva York – 28 d'ochobre de 1939, Nueva York) foi una actriz d'Estaos Xuníos ganadora d'un Óscar qu'empezó la so carrera nel cine mudu y sobrevivió a la transición al cine sonoru. Trabayó hasta seis meses antes del so fallecimientu en 1939 por causa de un cáncer. Quiciabes ye más recordada pol so papel de madre de Carole Lombard en My Man Godfrey (Al serviciu de les dames), estrenada en 1936.
Carrera
Brady nació en Nueva York, y el so verdaderu nome yera Mary Rose Brady. Dende la so infancia quixo ser actriz. El so padre, William A. Brady, yera un importante productor teatral, y ella consiguió'l so primer trabayu en Broadway en 1911, a los 18 años d'edá, nun espectáculu nel que participaba'l so padre. Ella siguió actuando en Broadway (de cutiu en funciones producíes pol so padre) a lo llargo de los siguientes 22 años. En 1931 participó nel estrenu de la obra d'Eugene O'Neill Mourning Becomes Electra.
El padre de Brady entró a trabayar na producción cinematográfica en 1913, con World Film Corporation, y ella llueu siguió los sos pasos, debutando nel cine mudu col filme As Ye Sow en 1914. Actuó en 53 filmes a lo llargo de los siguientes diez años, alternando estes actuaciones col teatru, una y bones la industria cinematográfica de la dómina taba centrada en Nueva York.
En 1923 dexó'l cine pa concentrase nel teatru, y nun volvió a la gran pantalla hasta 1933, cuando se treslladó a Hollywood y rodó el so primer títulu sonoru, When Ladies Meet (De muyer a muyer), de la Metro-Goldwyn-Mayer. A partir d'entós y hasta la so muerte siete años dempués, participó n'otres 25 películes. El so últimu títulu foi Young Mr. Lincoln (Young Mr. Lincoln) (1939).
Brady tuvo casada col actor James Crane ente 1919 y 1922, añu en que se divorciaron. Tivieron un fíu, Donald. Alice Brady finó por causa de un cáncer en 1939, cinco díes antes de cumplir los 47 años.
Gallardones
Pola so interpretación de Mrs. Molly O'Leary nel filme de 1937 In Old Chicago (Chicago), Brady ganó l'Óscar a la meyor actriz de repartu. L'añu anterior fuera nomada pal mesmu gallardón pol so trabayu en My Man Godfrey (Al serviciu de les dames).
Filmografía escoyida
Ente los sos más de 80 filmes inclúyense:
Referencies
- Esta obra remanez de la traducción de Alice Brady de Wikipedia - inglés, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.
Enllaces esternos
- Wikimedia Commons acueye conteníu multimedia sobre Alice Brady.
- Alice Brady na Internet Movie Database (n'inglés)
- Alice Brady na Internet Broadway Database (n'inglés)