Alfa Chamaeleontis (α Cha / HD 71243 / HR 3318) ye la estrella más brillosa de la constelación Chamaeleon, el camaleón, con magnitú aparente +4,05. Alcuéntrase a 63,5 años lluz de distancia del Sistema Solar.
Alfa Chamaeleontis ye una estrella blancu-mariella catalogada como una nana mariella de tipu espectral F5V o como una xigante de tipu F5III. La so lluminosidá 7,1 vegaes mayor que la del Sol y la so temperatura superficial d'aproximadamente 6770 K, dan como resultáu un radiu 2,3 vegaes más grande que'l radiu solar. La teoría d'estructura estelar indica que la estrella en realidá nun ye una xigante, sinón una estrella de la secuencia principal con una masa un 55% mayor que la masa solar. Con una edá en redol 1500 millones d'años tien de tar rematando la so etapa como nana na cual tien llugar la fusión nuclear d'hidróxenu. Per otra parte, presenta un conteníu alto de litiu y nitróxenu, y anque la bayura d'ésti últimu elementu aumenta al avieyar la estrella, col litiu tendría d'asoceder xustamente lo contrario.
La velocidá de rotación mínima d'Alfa Chamaeleontis ye de 29 km/s, completando un xiru en menos de 2,3 díes. Namái se conoz la llende inferior una y bones s'ignora l'enclín del so exa de rotación.
