نيكاراݣوا، رسميا لجمهورية د نيكاراݣوا (بالصبليونية: República de Nicaragua) هي بلاد جات ف أمريكا لوسطانية، و أكبر بلاد فيها. تاتحدّها هوندوراس من الشمال لغربي، لبحر د لكاريبي من الشرق، كوسطاريكا من لجنوب، و لمحيط لهادي من لجنوب لغربي.
أول مرة وصلو لأوروپيين للبلاصة اللي فيها نيكاراݣوا كانت ف لقرن 16، ملي دخلات صبانيا وحتلاّت لأرض اللي كانت مسكونة من بزاف د لقبايل من شحال د لوقت. ف 1821، ستاقلات لبلاد من صبانيا، و ف 1838 ولاّت جمهورية. واحد الطرف د نيكاراݣوا (الساحل د الناموس) كان مستعمر من بريطانيا، و ستاقل بوحدو ف 1860. من موراها دخل مع نيكاراݣوا، و لكن الشمال ديالو تعطا لهوندوراس ف 1960.
نيكاراݣوا دازو فيها بزاف د لمشاكل سياسية من نهار ستاقلات، و دازت فيها حروب أهلية و وقات د الديكتاتورية و لأزمات لإقتصادية و لإعصارات. من بين لمشاكل لكبار اللي وقعو ف لبلاد كانت التورة د 1960-1970، و لحرب لأهلية ديال التمانينات.
تيسكنو ف نيكاراݣوا تقريبا 6.5 مليون د الناس و لعاصمة ديالها هي ماناݣوا. اللغة الرسمية د لبلاد هي الصبلونية، و كاين بزاف د اللغات محلية تاتعتارف بيهم الدولة لغات جهوية. حتا لينݣليزية محسوبة معاهم، و تاتّهضر ف شي بلايص من لبلاد. لفلوس اللي كاتخدّم هي لكوردوبا، و النضام د لحكيم رئاسي (الرئيس د لبلاد من 2007 لدابا هو دانييل أورطيݣا). نيكاراݣوا داخلة ف بزاف د لمنضمات دولية منها لأمم لمتحدة و لبنك الدولي و صندوق النقد الدولي و منضمة التجارة لعالمية و الجماعة د لكاريبي.