Villa Rides

Villa Rides (títol orichinal en anglés, en aragonés Villa cabalga, estrenada en Aragón con iste segundo títol) ye una cinta de cine estausunidense de cine de western belico estrenada l'anyo 1958, dirichida por Buzz Kulik seguntes un guión adaptau por Robert Towne y Sam Peckinpah (basau en una historia de William Douglas Lansford basada a a vegada en Pancho Villa, de William Douglas Lansford), con una banda sonora orichinal de Maurice Jarre, una direcció de fotografía de Jack Hildyard y una producción cinematografica de Ted Richmond ta la productora cinematografica Paramount Pictures. Conta con un elenco d'o cual en fan parte, entre d'atros actors, Yul Brynner, Robert Mitchum, Maria Grazia Buccella, Charles Bronson, Herbert Lom, Robert Viharo, Frank Wolff, Alexander Knox, Diana Lorys, Robert Carricart, Fernando Rey, José María Prada, Antoñito Ruiz, Jill Ireland, Seyyal Taner, Regina de Julián y Andrés Monreal.

En os anyos 1910 mientres a Revolución mexicana, Lee Arnold ye un piloto estausunidense que transporta armas ta l'exercit mexicano. Como conscuencia d'una avería d'o suyo avión ha de remanir en tierra bels días y ixo li fa conoixer dos diferents opinions sobre lo rebel Pancho Villa: ta l'exercito ye un bandiu, ta lo pueblo, un heroi. S'alocha en casa d'o ferrero que ha de reparar o suyo avión, pero de rapiconte plegan en o lugar soldaus mexicanos, que violan a la filla d'o ferrero y dimpués enforcan a bels habitants, entre éls a lo ferrero. Pero bien luego tamién plegan os soldaus de Pancho Villa, que redotan a las tropas regulars y dimpués fan un chuego ta matar un a un a los soldaus rendius. Arnold, cuan Villa sabe que traficaba armas ta l'exercito, lo tracta como a los soldaus, pero logra salvar a suya vida cuan explica que con o suyo avión puet aduyar a Villa, prencipiamdo asinas un contacto mas directo con os rebels y con o propio Villa, de quien se converte en una mena de consellero independient y a qui aduya a ganar bellas batallas. Sindembargo, Villa buen luego topa con o cheneral Victoriano Huerta, oficialment subordinau a lo president Francisco Madero pero que en realidat ye preparando un golpe d'estau contra Madero ta substituyir-lo en a presidencia. Finalment, mesmo Villa que Arnold cayen presoneros de Madero dimpués que iste haiga feito lo suyo golpe d'estau.

A cinta s'ambienta en Mexico y en El Paso (Texas) en os Estaus Unius, y las suyas escenas se filmoron en El Casar (Castiella-La Mancha) y Madrit (Comunidat de Madrit) en Espanya y en Ciudad Obregón (Sonora), Guanajuato (Guanajuato) y en os estaus de Chihuahua y Durango en Mexico, amás d'en os Paramount Studios en Los Angeles (California) en os Estaus Unius.