A Republica de Weimar ye lo nombre con que se conoix en a historia a lo rechimen politico que teneba Alemanya durant o Periodo d'entreguerras, ye decir, dende que remató la Primera Guerra Mundial en 1918 con a cayida de l'Imperio Alemán dica plegar enta la dictadura d'Adolf Hitler en 1933, cuan iste establió lo dito Tercer Reich.
Se conoix a iste rechimen con o nombre d'a ciudat de Weimar, en estar en ista ciudat a on se reunió dimpués d'a redota de l'Imperio Alemán en a Primera Guerra Mundial l'Asamblea Nacional de Weimar, ta elaborar una nueva Constitución ta Alemanya, que se conoix con o nombre de Constitución de Weimar y que estió obchecto d'aprobación o 31 de chulio de 1919.
A Republica de Weimar estió lo primer rechimen democratico real d'a historia d'Alemanya, encara que demientres a suya existencia bi habió muitas tensions y luitas politicas. Cuan plegó enta lo poder Adolf Hitler, no abolió legalment a vichencia d'a Constitución, encara que s'apreboron mesuras que de facto facioron desapareixer a democracia en o país, establindo una dictadura, que se conoix con o nombre de Tercer Reich. Legalment, a Constitución de Weimar no s'abolió dica rematar a Segunda Guerra Mundial.
Vinclos externos
- (de) Archivo d'as leis d'a Republica de Weimar.
- (de) Base de datos electorals d'a Republica de Weimar.
