Innerspace

Innerspace (títol orichinal en anglés, en aragonés Espacio interior, estrenada en Aragón con o títol en castellano d'El chip prodigioso, en aragonés O chip prodichioso) ye una cinta de cine de comedia d'aventuras de ciencia-ficción estrenada l'anyo 1987, dirichida por Joe Dante seguntes un guión adaptau por Jeffrey Boam y Chip Proser (basau en una historia de Chip Proser), con una banda sonora orichinal de Jerry Goldsmith, una dirección de fotografía d'Andrew Laszlo y una producción cinematografica de Michael Finnell y Chip Proser ta la productora cinematografica Amblin Entertainment. Conta con un elenco d'o cual en fan parte Dennis Quaid, Martin Short, Meg Ryan, Kevin McCarthy, Fiona Lewis, Henry Gibson, John Hora, Robert Picardo, Wendy Schaal, William Schallert, Harold Sylvester, Mark L. Taylor, Vernon Wells, Orson Bean, Kathleen Freeman, Archie Hahn, Kevin Hooks, Dick Miller y Neil Ross, entre d'atros actors.

Tuck Pendleton ye un tenient de l'exercito estausunidense que renuncia a lo suyo cargo ta partecipar en un experimento secreto en San Francisco. L'introducen en una capsula submerchible y miniaturizan lo conchunto, trasferindo-lo a una ixaringa ta implantar-lo en un conello. De rapiconte, lo laboratorio ye atacau por una organización rival ta apropiar-se de l'experimento y lo supervisor de l'experimento, Ozzie Wexler, fuye con l'ixaringa ta, estando feriu, inchectar l'ixeringa a un desconoixiu, Jack Putter, qui treballa en un supermercau. Tuck creye estar en o conello pero en no conseguir contactar con o laboratorio marcha enta lo niervo optico d'o presunto conello ta implantar-ie una camara y veyer lo que veye lo "conello", descubrindo que se troba en un cuerpo humán. Connecta un atro dispositivo a l'orella de Jack ta asinas charrar con él, ta decir-le que ha de marchar enta lo laboratorio ta extrayer-lo antes de que consuma tot l'oxicheno. En o laboratorio lis explican que los atacants roboron un d'os dos chips informaticos que s'amenistan ta fer o proceso y que l'autor d'o robo ha estau Victor Scrimshaw. Jack contacta con Lydia Maxwell, una antiga novia de Tuck que ye periodista y tien contactos con Cowboy, un d'os farutes de Scrimshaw. Lydia seduz a Cowboy y Jack el deixa inconscient, pero a la fin Igoe, un atro farute, captura a Lydia y Jack. Cuan istos dos se besan, en a ixaliva se transmite Tuck enta Lydia, y miniaturizan a Igoe ta que dentre en o cuerpo de Jack, mate a Tuck y s'apodere d'o segundo chip, pero Jack y Lydia consiguen liberar-se, apoderar-se d'o laboratorio y miniaturizar a toda la banda. De mientres, Tuck descubre que Lydia ye embarazada de su fillo, antes de que Jack y Lydia tornen a besar-se ta tornar a Tuck enta lo cuerpo de Jack.Pero Igoe consigue localizar a Tuck en o cuerpo de Jack y danya lo submerchible, encara que Tuck consigue matar-lo y disolverlo en l'acedo de l'estomago de Jack. Cuan Tuck ye bien amán de morir por falta d'oxicheno, consiguen que Jack l'expulse con un estarnudo y a la fin Tuck se casa con Lydia, pero ixe no ye encara lo final d'a historia.

A cinta s'ambienta en a suya epoca actual (1987) en San Francisco (California); y las suyas escenas se filmoron en Burbank, Los Angeles, Mill Valley, Rancho Palos Verdes y San Francisco (California), amás d'en os Warner Brothers Burbank Studios situaus en Burbank, tamién en California.

Se tracta d'una cinta que ha recibiu bels premios y nominacions, en destacando un Premio Oscar a los Millors Efectos Visuals l'anyo 1988 mientres a 60^ena edición d'os Premios Oscar.