About Schmidt

Iste articlo ye sobre una cinta estausunidense de comedia dramatica de l'anyo 2002; ta atros usos, se veiga About Schmidt (desambigación).

About Schmidt (títol orichinal en anglés, en aragonés Sobre Schmidt, estrenada en Aragón con o títol en castellano d'A propósito de Schmidt, en aragonés A proposito de Schmidt) ye una cinta de cine estausunidense de cine de comedia dramatica estrenada l'anyo 2002, dirichida por Alexander Payne seguntes un guión adaptau por él mesmo y por Jim Taylor (basau en About Schmidt, una novela publicada por Louis Begley), con una banda sonora orichinal de Rolfe Kent, una dirección de fotografía de James Glennon, una producción cinematografica de Michael Besman y Harry Gittes ta la productora cinematografica New Line Cinema y un elenco formau por Jack Nicholson, Kathy Bates, Hope Davis, Dermot Mulroney, June Squibb, Howard Hesseman, Harry Groener, Connie Ray, Len Cariou, Matt Winston y Phil Reeves, entre d'atros actors.

Warren Schmidt treballaba como actuario en una companyía de seguros de vida, WoodmenLife, en Omaha y acaba de pasar a la retreta. Se li fa difícil a suya nueva vida, y encara mas cuan bien luego muere su muller. Veye un anuncio por televisión y decide apadrinar a un nino en Tanzania, Ndugu Umbo, a qui nivía cartas a on li explica bien sincerament a suya vida. Cuan va enta la suya oficina a ufrir cualsiquier aduya que ameniste lo suyo succesor, iste refusa amablement, pero en marchar veye los suyos archivos aventaus a la vasuera. Ta lo funeral de su muller i plega dende Denver su filla, Jeannie, y lo suyo novio Randall Hertzel, que Warren creye (pareixe que acertadament) que no ye adecuau ta su filla. Prebando de deseparar-los, demana a Jeannie que torne enta cada ta cudiar-lo, pero ista se niega. Como chusto antis de morir su muller ista li heba feito mercar una autocaravana Winnebago Adventurer, aborriu de tot y dimpués de trobar prebas de que su muller l'enganyaba con o suyo millor amigo, decide viachar en l'autocaravana enta casa de su filla, pero ista li diz que como se casará bien luego, que no vienga antis d'o día d'a voda, asinas que Warren s'adedica a visitar puestos d'o suyo pasau, sin masiau exito. Cuan finalment plega en Denver, fa estacha en casa d'a mai de Randall, Roberta, y se troba bien luego desplazau en veyer que son d'una clase social bien baixa y con bien poco refinamiento. Bien decepcionau, tona enta la suya casa, només que ta trobar una carta dende Tanzania a on una moncha li diz que Ndugu tien nomás que 6 anyos y no puet leyer ni contestar as suyas cartas él mesmo, pero que las agradece muito, mesmo que la suya aduya economica. Nomás l'aconsola que un dibuixo adchunto a la carta.

A cinta s'ambienta en a suya epoca actual (2002) en Omaha (Nebraska) y Denver (Colorado) y las suyas escenas se filmoron en Kearney, Lincoln, Minden, Nebraska City, Ogallala, Omaha y atros puestos de Nebraska, en Boulder y Denver (Colorado) y en Council Bluffs (Iowa).

Se tracta d'una cinta que ha recibiu cuantismos premios y nominacions, en destacando dos nominacions en 2003 en os Premios Oscar (Millor Actor y Millor Actriz Segundaria) en a 75^ena edición de ditos premios; una nominación en 2003 en os Premios BAFTA (Millor Actor) en a suya 56^ena edición; y dos Premios Globos d'Oro (Millor Guión y Millor Actor Dramatico) y tres nominacions (Millor Cinta Dramatica, Millor Director y Millor Actriz Segundaria) en 2003 mientres a 60^ena edición d'os Globos d'Oro.