Puerto Rico

2 min read
In 183 languages
2 images
On the map

Dä Artikel bhandlet de Staat. Wyteri Bedütige vo „Puerto Rico“ findsch doo.

Dr Freistaat Puerto Rico (spanisch Estado Libre Asociado de Puerto Rico, änglisch Commonwealth of Puerto Rico, früehner dütsch au Portoriko) isch eins vo de US-amerikanische Ussegebiet.

Puerto Rico bedütet „riiche Hafe“. Dä Iiwohner vo Puerto Rico sait mä uf Dütsch „Puerto-Ricaner“, im latinoamerikanische Spanisch und au uf dr Insle sälber sait mä Boricua. Dr ursprünglig Name vo dr Insle isch uf arawakisch Borikén, d Puerto-Ricaner sägen ere hüfig Borinquén.

Geographii und Klima

Dr Inselstaat lit in dr Karibik und bestoht us dr Insle Puerto Rico und de chliinere Näbeninsle Vieques, Culebra, Culebrita, Desecheo, Palomino, Mona, Caja de Muertos, und Monito.

Puerto Rico isch die östligsti und chliinsti Insle vo de Grossen Antille. Öbbe 150 km im Weste lit d Insle Hispaniola mit de Staate Haiti und dr Dominikanische Republik, 100 km östlich lige d Jumpfereinsle und 800 km südlig, uf dr andere Site vo dr Karibik, befindet sich Südamerika.

S Meer um Puero Rico ume isch sehr dief: Im Norde vo de Insle git s s Milwaukiedief im Puerto-Rico-Grabe im Atlantik, wo 9.219 Meter dief isch, im Süde s 5.649 m diefi Venezolanischi Becki vo dr Karibik. Grossi Deil vo dr Insle si gebirgig (60 Prozänt vo dr Oberflechi), aber es git au Gebiete mit Rägewälder und Wüestene.

Höchst Bärg: Cerro La Punta (1.338 Meter).
Lengst Fluss: Rio de la Plata (97 Kilometer)

D Insle het e dropischs Klima mit Durchschnittstämprature vo öbbe 28 °C. An dr Nordküste und im Hochland rägnets am meiste, während dr Süde relativ drochen isch.

Bevölkerig

D Iiwohner vo Puerto Rico si über 78 Gmeinde verdeilt. Meh as 80 Prozänt vo de knapp vier Millione Puerto-Ricaner si nominal römisch-katholisch, praktiziere düen öbbe 55 Prozänt). D Insle ghört zwar zu de USA, aber nume öbbe e Zähntel bezeichne sich as US-Amerikaner. Die meiste (öbbe 87 Prozänt) gsehn sich as Nochkomme vo de Spanier oder vo afrikanische Sklave. Für über 93 Prozänt vo dr Bevölkerig isch Spanisch d Muetersprooch. Änglisch schwätze nume sibe Prozänt as Erstsprooch.