Heinz de Specht isch es Schwizer Chliikunscht-Trio, wo us em Christian Weiss, em Daniel Schaub, baidi Zürcher, und em Sanggaller Roman Riklin zämegsetzt isch.
Gschicht
Im 2004 hät Heinz de Specht sini erschti Tournee im Hechtplatz-Theater z Züri gstarted. Si sind es multiinstrumentals Trio, eri Lieder e Mischig us Musig und Comedy, wo witzig und fräch sind. Eren Humor isch schwarz und d Poänte mängmol eso happig, as aim fasch s Lache im Hals stecke blibt. Di maischte Text sind vom Christian Weiss – Text schriibe tüend aber au di andere baide Musiker. De Roman Riklin isch au en Komponischt vo verschidene Musicals, wie zum Bischpiil «Ewigi Liebi» und «Mein Name ist Eugen». I de erschte zäh Johr händs mit erem obedfüllende Programm a di 500 Konzärt gspillt. S Trio isch scho drümol (März 2010, November 2011 und November 2014) i de Sändig Giacobbo/Müller im Schwizer Färnseh ufträtte. I de Sändig «Comedy us em Labor» hät mer si au scho chöne gseh.
Bishär hät Heinz de Specht füf Albe use gee, di erste drü bi Bretterwelt, die baiden andere bi Gadget Records. Es git e DVD mit em Name macht uns fertig!, wo bi Bretterwelt usecho isch (Stand 2018). Im Novämber 2018 hät „Heinz de Specht“, wie bi erer erste Tournee, im „Theater am Hechtplatz“ mit em Liederobed „Tribute to Heinz de Specht“ eri Abschidstour gstarted. Am 2. Juni 2019 söll dänn de letschti Vorhang falle.
Urheberrächtsproblem
Uf de CD Därf mer das?, wo im 2014 usechoo isch, gfindt me s Lied «Aromat» und drum händs uf d CD-Hülle s Bild vom Knorrli tue, wo uf jedem gääl-grüe-roote Aromat-Büggsli z gseh isch. S Trio isch dänn aber vo de Firma Knorr (Unilever-Konzärn) us Tääinge ufmerksam gmacht worde, as me das nöd därf, wil dä chli root Aromat-Maa urheberrächtlich gschützt segi. Drum händs es neus Bild müese entwärfe und di scho truckte CD-Hülle mit eme Chläber verdeckt, wo druf gstanden isch, as de Gebruuch vom Knorrli missbrüüchlich segi.
Videoclip
Vom Heinz de Specht gits au es paar Videoclip uf YouTube. Au do nämed si kais Blatt vor s Muul, wie s Bischpil «Afrika» zaigt, wos um d Iiwanderig goht. Endi Augschte 2016 häts wägen aim Filmli en chlinne Wirbel geh im Netz. Im Lied «Nur din Job» und em gliichnaamige Clip kritisiert s Trio de Boulevard-Journalismus, vorallem de Blick wäg de Prichterstattig vom Mordfall z Rupperswil.
Diskografii
Albe:
- 2007: Lieder aus der Vogelperspektive
- 2009: Macht uns fertig! (CD und DVD)
- 2012: schön
- 2014: Därf mer das?
- 2015: Party
Weblink
- Heinz de Specht di aktuelli Website
- Heinz de Specht di alti Website
