Jeon of Jeon Arvani, nomber artistico di Jonathan Bryan Thiel, (☆ 27 di januari 1991 na Santa Cruz), ta un musico, cantante, rapper, compositor y producer Arubiano. E ta rap na Papiamento.
Bida y carera
Jonathan Thiel a nace na Aruba den un famia musical. E tin tres ruman y ta e yiu mas chikito di su mayornan. Su tata Robert Thiel, ta pianista, producer musical y dirigente di un banda musical, cu ta conoci pa e hit Duna bo un serenata. Su wela tambe tabata musico. Desde edad di ocho aña el a cuminsa haya les di piano di su tata. Gradualmente el a siña toca diferente instrumento manera cuatro, wiri, conga y percusion. Despues di completa su enseñansa primario el a sigui pa EPB Hato.
Thiel a cuminsa subi tarima cu 14 aña. Na 2007, bou nomber "Biggy Boy", el a sali rey hubenil di roadmarch cu su composicion Move cu mi y rey hubenil di calypso cu Nos mes. El a haci su debut como hoben musico cu e cancion E Gaiton den e grupo Gaitas Sensacionales. Su prome hit tabata Mi kier bo ta felis (2008), cu a pega na tur tres di e islanan ABC. Djey el a skoge pa transforma di Biggy Boy pa e artista Jeon, nomber deriva di Jonathan.
Durante su carera musical Jeon a produci riba 500 cantica. E ta compone den varios estilo y ritmo, aplicando fusion entre reggaeton, rap, zouk y ritmo combina. Su composicionnan, manera Dushi bida y Ta mi hendenan, a sa di score hitnan den gran parti di Reino Hulandes, Colombia y Venezuela. Na varios ocacion el a wordo elegi "artista di aña" y a ricibi reconocimento como embahador di Boneiro y Corsou. Durante Arte di Palabra na 2017 a dune un homenahe pa su aporte na idioma Papiamento.
Pa su proyectonan musical el a colabora cu e artista Arubano Ataniro y Basic One, agrupacion cu cual el a presenta tambe como cantante. Na 2016, despues di a muda pa Hulanda e aña prome, el a firma cu e label diskero di Sony. Na aña 2018 el a graba, hunto cu e cantantenan J Balvin di Colombia y Anitta di Brazil, e hit internacional Machika, logrando un “platinum album”. Jeon a presenta cu concierto di artistanan grandi, manera Romeo Santos, Juan Luis Guerra, Zion & Lennox.
Na 2025, Jeon a lansa e cantica Bluewave (of Mama wak), compone den ritmo kompa y produci pa Steve Andreas. E cantica a bira popular como himno special di e seleccion di Corsou relaciona cu su clasificacion exitoso pa Copa Mundial 2026. Su letra ta refleha e orguyo colectivo rond di e logro deportivo y ta referi na varios miembro di e seleccion.
Jeon a habri cu su presentacion Curaçao North Sea Jazz Festival 2026 na Willemstad.
Discografia
Single
- Dushi Bida (2016)
- Bon Vibe
- It is what it is
- Chiki Cha (cu Ritmo Real)
- Amanecer ( cu Leo Herrera)
- Machika (2018, cu J.Balvin y Anitta)
- Aruba (2018)
- Nijmegen (2022, cu Ori)
- Miss Dior (2023)
- Caya ta Papia (2024)
Album
- Biggy Boy Forever
- Santa Cruz
- Otra noche
Fuente, nota i/òf referensia
