Varmia-Mazuria provinco (pole Województwo warmińsko-mazurskie) aŭ mallonge Varmio-Mazurio ekde la jaro 1999 estas unu el la 16 provincoj de Pollando.
Ĝi situas norde kaj havas pecon de marbordo ĉe la Balta maro. La nomo de la provinco devenas de du historiaj regionoj: Varmio kaj Mazurio. La Varmia-Mazuria Provinco formiĝis dum la pola teritoria reformo de 1999, esence de la antaŭaj vojevodioj de Olsztyn (germane Allenstein), Suwałki (litove Suvalkija) kaj Elbląg (germane Elbing). Individuaj municipoj ankaŭ antaŭe apartenis al la vojevodioj Ciechanów, Ostrołęka kaj Toruń. Historie, la nuna provinco ampleksas precipe la sudan parton de la antaŭa provinco Orienta Prusio de la Germana Regno, kvankam certaj partoj en la ekstrema sudokcidento antaŭ 1945 apartenis al la najbara provinco Okcidenta Prusio de la Germana Regno, kiu jam ekde 1920 kaj 1939 post la traktato de Versajlo estis donitaj al la Dua Pola Respubliko.
La provinco konsistas el 19 distriktoj kaj du eksterdistriktaj urboj. Ĝia ĉefurbo estas Olsztyn. Estas iom malpli ol 1,5 milionoj da loĝantoj.
La 19 distriktoj detale estas:
- distrikto Bartoszyce (germane Bartenstein)
- distrikto Braniewo (germane Braunsberg)
- distrikto Działdowo (germane Soldau)
- distrikto Elbląg (germane Elbing)
- distrikto Ełk (germane Lyck)
- distrikto Giżycko (germane Lötzen)
- distrikto Gołdap (germane Goldap)
- distrikto Iława (germane Eylau)
- distrikto Kętrzyn (germane Rastenburg)
- distrikto Lidzbark (germane Heilsberg)
- distrikto Mrągowo (germane Sensburg)
- distrikto Nidzica (germane Neidenburg)
- distrikto Nowe Miasto (germane Neumark in Westpreußen)
- distrikto Olecko (germane Treuburg)
- distrikto Olsztyn (germane Allenstein)
- distrikto Ostróda (Osterode in Ostpreußen)
- distrikto Pisz (germane Johannisburg)
- distrikto Szczytno (germane Ortelsburg)
- distrikto Węgorzewo (germane Angerburg)
